Esas Ukrainada qıdırılğan «Nord» Keriç gemisiniñ kapitanı Vladimir Gorbenko Rusiye işğal etken Qırımğa qayttı. Video «Komsomolskaya pravda» saytında derc etildi.
Gorbenkonıñ aytqanına köre, «onıñ evge qaytmaq içün iç bir maniası yoq edi». «Rusiye pasportınen sıñırdan keçkenini» ayta. Kapitan Qırımğa kirgen keçiş noqtasını aydınlatmay.
Gorbenkonıñ aytqanına köre, «bir de bir qanunnı bozmadı, özüni qabaatlı dep saymay». Tevqif etilgen geminiñ kapitanı, ileride de balıqçıqlınen oğraşmağa niyetlene, dep ayta. O, Rusiye ükümeti «Nord» ekipajına yañı gemini almağa yardım eter, dep ümüt ete.
Ukraina uquq qoruyıcı organları ve Qırım Muhtar Cumhuriyetiniñ prokuraturası Gorbenkonıñ Qırımğa qaytuvınen bağlı beyanatını daa izaatlamadılar.
Daa evel «Nord» kapitanınıñ advokatı Maksim Mogilnitskiy müvekkili esas Ukrainada ğayıp oldı, dep ariza berdi. Mogilnitskiy müşterisi ile bağı üzülgenini bildirgen edi. Advokatnıñ aytqanına köre, Gorbenkonıñ ğayıp oluvı Ukraina mahsus hızmetlerinen bağlı ola bile. Ukraina telükesizlik hızmeti «Nord» Keriç gemisi kapitanınıñ ğayıp oluvınen bir de bir alâqaları olğanını red etti.
Yanvarniñ 30-nda Zaporijjâ vilâyetiniñ Melitopol politsiyası «Nord» gemisiniñ kapitanı Vladimir Gorbenkonıñ ğayıp oluvınen bağlı cinaiy iş açtı.
2018 senesi martnıñ 25-nde Ukraina Devlet sıñır hızmeti Azaq deñizinde Rusiye bayrağı altında işğal etilgen Qırımdan balıqçı gemisini tuttı.
Qırım Muhtar Cumhuriyetiniñ prokuraturası «Nord» gemisiniñ Kyiv qapatqan işğal altındaki Keriç limanından çıqqanınen bağlı cinaiy iş açtı, 2018 senesi martnıñ 20-nda Ukraina mahkemesi gemini tevqif etti.
Herson şeer mahkemesi gemi kapitanı Vladimir Görbenkonı nezaret altına aldı. Onıñ içün pey berildi – 35 biñ 240 ğrıvnâ. Daa soñra onı azat etip, Qırımnı ziyaret etmege yasaq ettiler.
2018 senesi avgust ayında Qırım Muhtar Cumhuriyetiniñ prokuraturası «Nord» gemisiniñ kapitanına qarşı mahkemeden evel tahqiqatnı yekünledi.
2014 senesi iyül ayından başlap Ukraina ükümeti Rusiye işğal etken yarımada limanlarınıñ işini resmiy şekilde toqtattı, Qırım limanları halqara gemiler içün qapalı qala.
