Aprelniñ 15-nden itibaren işğal etilgen Qırımda vatandaşlarnıñ areketleri sert bir şekilde kontrol etilecek. Yarımada soqaqlarında politsiya devriyesini arttırmağa planlaştırıla.
Bu aqta aprelniñ 14-nde Qırımdaki Rusiye İç işler nazirliginiñ yolbaşçısı Pavel Karanda koronavirus yuqunçınıñ tarqaluvına qarşı operativ ştab toplaşuvında bildirdi.
Onıñ qayd etkenine köre, evden çıqqan qırımlılarnıñ yanında pasportı olmalı.
«Siziñ buyruğıñız (Qırımnıñ Rusiye yolbaşçısı Sergey Aksenovnıñ – QA) yüksek seviyeli azırlıq rejiminde vatandaşlarnıñ nizam qaidelerini belgilemekte. Rusiye ükümetiniñ aprelniñ 2-nde qabul etken qararı bar, o, şeerge çıqqan vatandaşlarnı yanına pasport ya da şeerge çıqqanına izin bergen diger vesiqalarnı almağa mecbur ete. Böyle vesiqalar olmasa, bu rejim qaideleriniñ bozuluvı qayd etilecek», – dedi İç işler naziri.
Karandanıñ bildirgenine köre, politsiya hadimleri qayd oluv yerine baqacaq.
«Vatandaşnı tutsaq, şeerniñ bir tarafında qayd olıp, başqa tarafında olsa, amma tükânğa ketkenini aytsa, bu şübhe doğura», – dep qayd etti müessise yolbaşçısı.
Onıñ aytqanına köre, politsiya naqliyat areketlerini video nezareti kameraları yardımınen taqip etecek.
Qırımnıñ Rusiye parlamenti yarımadada memuriy cinayetler qanunınıñ tüzetüvlerini qabul etti. Deputatlar Qırımda özüni izolâtsiya etüv rejiminiñ bozuluvı içün para cezalarını sertleştirdi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
