Rusiye quvetçileri Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkeninde qabaatlap apiske alğan Enver Seytosmanov noyabrniñ 10-nda 33 yaşını toldurdı. Bu aqta «Qırım birdemligi» cemaat birleşmesi Facebook saifesinde bildire.
«Apiske alınmazdan evel Enver anası ve qardaşınen Aqyar şeeri Balıqlava rayonınıñ Hayto (Tılovoye) köyünde yaşağan edi. O, qabaatlayıcı ükümler çıqarılğan siyasiy mabüslerniñ qorantalarına çoq yardım ete edi. 2018 senesi mayısnıñ 10-nda evlerinde tintüv yapıldı, ondan soñ onı apiske aldılar. «Qırım birdemligi» cemaat birleşmesi adından Enver Seytosmanovğa qaviy sağlıq ve anası ve qardaşı beklegen evge tez qaytmasını tileymiz», – dep aytıla haberde.
Enver Seytosmanov mahkeme oturışuvları keçirilgen Rostov-na-Donuda buluna. Onıñ davası yekünlenüv basamağındadır.
İyülniñ başında Rostov-na-Donu mahkemesi Seytosmanovnıñ apis müddetini altı ayğa – dekabrniñ 20-ne qadar – uzatqan edi. İyülniñ soñunda ise Enver Seytosmanov Aqmescit SİZOsından Rostov-na-Donu SİZOsına avuştırılğan edi.
Avgust ayında Rostov-na-Donu mahkemesinde Enver Seytosmanovnıñ Aqyardaki «Hizb ut-Tahrir davasınıñ» temeli ilk sefer baqıldı.
Sentâbrniñ 5-6-nda Rusiye mahkemesi Enver Seytosmanovnıñ davası boyunca Aqyardaki «Hizb ut-Tahrir davasınıñ» eki mabüsi Nuri Primov ve Ferat Sayfullayevni sorğuğa çekti.
Rusiye quvetçileri ağa-qardaş Ernes ve Enver Seytosmanovlarnı 2018 senesi mayısnıñ 10-nda Aqyarnıñ Balıqlava rayonınıñ Hayto (Tılovoye) köyünde tintüvlerden soñ tutıp alğan edi.
Ernesni daa soñra yiberdiler, Enverge ise cinaiy dava açılğanı aqqında haber etildi. Onı Rusiye Ceza Kodeksiniñ 205.5 maddesine (terror teşkilâtınıñ faaliyetini teşkil etüv ya da iştirak etüv) istinaden qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
