2020 yılda "Eurovision" yır yarışmasını qabul etmeli olğan Niderlandlardaki kontsert zalı, bunıñ yerine aprelniñ 17-sinde koronavirus infektsiyası olğan hastalar içün qapılarını açacaq, bildire Azatlıq Radiosı.
Rotterdamdaki Ahoy Arenada, statsionar hastahaneleriniñ yüküni azlaştırmaq icün, 88 yataq qoluldı. Hastahanege qoyulmaqqa degil, amma tek tedaviylevge muhtacı olğan COVID-19 hastaları içün mahsus oda ayırıldı.
"Bazı adamlar evlerinde yaşap olamat ve ekimler qarar bergeni kibi olarnı baqmaq kerek. Yaqın arada biz olarnı mında qabul etip olurmız", - dedi Rotterdam bölgesiniñ sağlıq hızmetiniñ müdiri Saskia Baath.
Niderlandlar, koronavirus pandemiyasına qarşı küreşmek içün tam karantinni ilân etmege bir qaç Avropa ülkesinden birisidir.
Aprelniñ 14-ünde derc etilgen malümatqa köre, Niderlandlarda 27279 hasta qaud etildi, 2945 adam öldi.
"Eurovision" yır yarışı bu yıl mayıs ayında Niderlandlarda keçmeli edi, amma koronavirus pandemiyasından sebep lâğu etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
