Müessise malümatına köre, tanklarğa qarşı Javelin sistemaları da olğan Estoniyanıñ yañı arbiy yardımında pulemötlar, atıcı silâ parçaları, çeşit tehnika ve dalıcı teçhizatı bar.
Estoniyanıñ mudafaa naziri Hanno Pevkur fevralniñ 3-nde «yardım paketi Ukrayına Silâlı quvetlerinde endi qullanıla», dep bildirdi.
«Avropadaki soñki adise-vaqialar köstere ki, böyle raketalar ve diger arbiy yardımnıñ Ukrayınağa berilüvi devam etecek, ittifaqdaşlarımıznen beraber Kremlge Ukrayınağa zaferge qadar qoltutacağımıznı kösteremiz», – dedi Pevkur.
Kölemi, kelecek vaqtı ve yardımnıñ diger tafsilâtları telükesizlik maqsadınen aydınlatılmay.
Estoniya baş naziri Kaya Kallas bildirgenine köre, Avropanıñ «Şimaliy atlantik ittifaqnıñ şarqiy qanatında Rusiyeniñ ola bilecek arbiy telükesine azırlanmaq içün» üç-beş yılı bar.
The Times içün bergen intervyüsında o, Estoniya istihbaratınıñ malümatına esaslandı, oña köre, «Rusiyege NATOnıñ şarqiy azaları sıñırlarında cenk telükesini ğayrıdan tiklemek içün üç yıldan beş yılğa qadar kerek olacaq».
Bundan ğayrı, Bild alman neşiriniñ malümatına köre, Bündesver (Almaniya Silâlı quvetleri) Rusiyeniñ NATOnıñ şarqiy qanatında gibrid ücümine azırlana. Neşir qayd etkenine köre, vesiqağa köre, NATO ve Rusiye arasında vaziyet bu yıl fevral ayında kerginleşe bile. Rusiye ve Ğarp areketleri ay-ay tarif etile, soñu ise yüz biñlernen NATO askeriniñ yerleşmesi ve 2025 senesi yazda cenk başlanması ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
