Estoniya Tış işler nazirliginiñ qayd etkenine köre, işğal etilgen Qırımda insan aqları vaziyeti fenalaşa. Memleketniñ Tış işler nazirligi Moskva qırımtatarlarğa qarşı basqı yapılmasını toqtatmalı, dep bildirdi.
«Qırımtatarlarğa yapılğan basqı toqtatılmalı – Rusiye tarafından qanunsız ilhaq etilgen Qırımda yapılğan tintüv ve tutuvlar aqqında haber alıp qasevetlendik. İnsan aqları vaziyetiniñ fenalaşması olmamalı. Vaziyetni diqqatnen közetemiz», – dep aytıla Estoniya nazirliginiñ Twitter haberinde.
Ukrainanıñ Estoniya elçisi Maryana Betsa resmiy Tallinnge Ukrainağa qoltutqanı içün teşekkürler bildirip, Rusiye «yapqan cinayetleri içün ceza çekmeli», dep qayd etti.
«Rusiye qırımtatar halqını susturacaq ve qorquzacaq ola. Rusiye yapqan cinayetleri içün cezalanmalı. İstilâcı devletke qarşı sanktsiyalar basqısınıñ quvetleştirilüvi birleşken cevabımıznıñ anahtarı olmalı», – dep aytıla haberde.
Daa evel haber etilgeni kibi, Avropa Birligi Rusiye akimiyetinden qırımtatarlarnıñ taqip etilüvini toqtatmasını talap etip, «qanunsız şekilde tutulğan bütün ukrainalılar tez vaqıtta azat etilecek», dep ümüt ete.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Martnıñ 27-nde ve 28-nde Aqmescitniñ Kiyev rayon mahkemesi tutulğan bütün faallerni apiske aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqa bildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
