Estoniya Tış işler naziri Urmas Reynsalu bazarertesi künü, iyünniñ 17-nde, Luxemburgda AB zenaatdaşlarınen körüşip, Avropa Birliginiñ umumiy tış siyaseti ve telükesizlik siyasetiniñ semereligini muzakere etecek. O, Avropa Birligini Rusiyeniñ Qırım ilhaqına aynı şekilde yanaşmağa çağıra. Bu aqta iyünniñ 16-nda Estoniya Tış işler nazirligi bildire.
«Bu körüşüvde esas diqqat müim meselege celp etile: Avropa Birligi tış siyasetini yekâne ve semereli bir şekilde keçirmesini nasıl temin ete bilemiz. Avropa Birliginiñ tış siyaseti meselelerinde küçlü ve tam bir ses dünyadaki telükesizligimizni kefil etmekte. Estoniya aza devletler AB umumiy tış siyasetiniñ şekillendirüvinde aynı seviyede iştirak etmege devam etmeli, dep tüşüne», – dep bildire tış işler naziriniñ aytqanlarını matbuat hızmeti.
Muzakerelerde Estoniya Tış işler naziri Avropa telükesizligi içün sıqı Avropaatlantik işbirligi, Rusiyege nisbeten siyasette ise birdemlik müim olğanını qayd etmege planlaştıra.
«Qırım işğalinden soñ Avropa Birligi Ukraina mustaqilligi ve topraq bütünliginiñ esas tarafdarlarından biri oldı. Sanktsiyalar halqara uquqnıñ qaba bozuluvına berilgen cevaplarnıñ semereli aletlerden biri qalmağa devam ete, ve Rusiye Minsk añlaşmalarını yerine ketirgenine ve vaziyetni eyiliştergenine qadar bizler buña devam etmelimiz», – dep qayd etti Reynsalu.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
