Rusiye Estoniyağa topraqlarnıñ 5,2%-ını alâ daa qaytarmadı, dep bildirdi Cumhuriyetniñ iç işler naziri Mark Helme. Onıñ aytqanına köre, Moskva «topraqnı qaytarmağa, onıñ ivazını tölemege, bu meseleni muzakere etmege bile» istemey. Bu aqta Azatlıq Radiosınıñ rus bürosı ERR Estoniya teleradio şirketiniñ malümatına esaslanıp bildire.
«Estoniya topraq meselesiniñ halqara uquq çerçivesinde çezilmesini beklemege azır. Rusiye ile cenkleşmege istemeymiz», – dep qoştı Helme.
Nazir angi topraqlar aqqında laf ketkenini aytmadı.
Amma, TASS Rusiye diplomatik menbasına esaslanıp yazğanına köre, laf İvangorod ve Peçorskiy rayonınıñ bir qısmı aqqında kete bile.
Estoniya iç işler naziri Rusiye ile topraq davasınıñ mevzusını jurnalistlerniñ Frenkistannıñ «Milliy birleşüv» yolbaşçısı Marin Le Penniñ ziyaretinen bağlı sualinden soñ köterdi. Marin Le Penniñ fikirince, Qırım 2014 senesi Rusiye tarafından ilhaq etilmedi, «oña öz isteginen qoşuldı». Resmiy Parji Qırımnı ilhaq etilgen topraq dep saya.
