Estoniya, Rusiyeniñ Qırım ilhaqını iç bir vaqıt tanımaycaq. Bu aqta Estoniya parlamentiniñ reisi Hennos Pylluaas Ukraina prezidenti Volodımır Zelenskıy ile körüşip ayttı.
«Estoniya – Ukrainanıñ sadıq dostudır. Devletniñ suvereniteti ve topraq bütünligine destegimiz deñişmedi», – dedi Pılluaas, dep bildire parlamentniñ matbuat hızmeti.
Eki taraf da eki devlet arasında sıqı munasebet ve konstruktiv işbirligi aqqında müsbet ayttı. Prezident ve spiker, Estoniya ve Ukrainanı bir degerler ve tarih birleştire, dep qayd ettiler.
Pylluaasnıñ bildirgenine köre, «Estoniya Qırımnıñ qanunsız ilhaqını iç bir vaqıt tanımaycaq ve Donbastaki cenkniñ bitmesine ve işğal etilgen topraqlarnıñ Ukrainağa qaytarılmasına yardım etken bütün teşebbüslerge qoltuta».
«Ne Avropa Birligi, ne de NATO ortaqlarımızğa bu meseleni unutmağa bermeycekmiz. Estoniya, Ukrainanıñ eki teşkilâtta da aza olmaq ıntıluvlarına qoltuta», – dep qayd etti parlament reisi.
Zelenskıy, Estoniyağa dostluğı ve destegi içün teşekkür bildirip, cumhuriyetniñ yardımı eñ emiyetli ola, dep qayd etti.
Ukraina prezidenti Volodımır Zelenskıy ve Estoniya prezidenti Kersti Kaljulaid noyabrniñ 26-nda Tallinde körüşip, Rusiyeni Qırım işğalini ve Donbastaki istilânı toqtatmasına çağırdılar.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
