Sentâbrniñ 19-dan başlap Estoniya Rusiye vatandaşlarına memleketke kirişni yasaq ete, şu cümleden üçünci devletler tarafından berilgen şengen vizaları olğanlarğa da. Bunı TİN yolbaşçısı Urmas Reynsalu haber etti.
Onıñ sözlerine köre, şengen vizaları olğan rusiyelilerge öz memleketlerine kirivnü Litvaniya, Letoniya ve Poloniya yasaq ete. Yañı qaideler sentbrniñ 18-den 19-na keçken gece çalışıp başlaycaq.
Estoniya TİN yolbaşçısı Reynsalu yasaq turistik vizalar ile seyaat etkenlerge ait olğanını, memleketke tuvğanları ile körüşmek ya da diger gumanitar sebeplerden kelgenlerge ise ait olmağanını bildirdi.
İyünniñ 1-den avgustnıñ 31-ne qadar Estoniya memleketten 99 Rusiye vatandaşını sürgün etti ve 582 rusiyelige memleketke kirişni yasaq etti.
Litvaniya, Letoniya ve Estoniya rusiyelilerniñ öz sıñırlarından Avropa Birligine kirişini sıñırlamağa añlaştı. Bu Avropa Birliginiñ devletleri şengen vizası olğan rusiyeliler içün qara sıñırlarnı keçüvde «ciddiy sıñırlavlar» aqqında qararnı qabul etti. Bu aqta Latviya Tış işler nazirliginiñ yolbaşçısı Edgars Rinkeviç bildirdi.
Avropa komissiyası sentâbrniñ 12-nden başlap Rusiye ile viza rejimini qolaylaştıruv añlaşmasından bütünley vazgeçüv qararını tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
