Eski siyasiy mabüs, qırımtatar faali Edem Bekirovğa daa bir ameliyat yapılacaq, şimdi o, hastahanede yata. Bu aqta faalniñ apayı Gülnara Bekirova Ukrinform mühbirine bildirdi.
«Kyivdeki ortopediya ve travmatologiya institutında tedaviylenmege devam ete. Üç afta devamında oña tamçılıq yapılacaq. Noyabrniñ 25-nde «Feofaniyada» ayaq damarlarınıñ stentlendirüv ameliyatınıñ olması planlaştırıla», – dep tarif etti Bekirova.
Eski siyasiy mabüs, qırımtatar faali Edem Bekirovnıñ qızı Eleonora yaqınlarda Ukraina Yuqarı Radasınıñ insan aqları vekâletlisiniñ mesleatçısı oldı.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
