Eski siyasiy mabüs, qırımtatar faali Edem Bekirovnıñ qızı Eleonora Ukraina Yuqarı Radasınıñ insan aqları vekâletlisiniñ mesleatçısı oldı.
Bu aqta Ukraina ombudsmeni Lüdmila Denisova bildirdi.
«O, Qırımnıñ tamır halqınıñ aqlarına riayet etüvnen oğraşacaq», – dep qayd etti Denisova.
Eleonora Bekirova bu malümatnı tasdıqlap, Ukraina ombudsmeniniñ taqımında «Kreml tarafından tutulğanlar eñ yaqın vaqıtta evge qaytsın dep küreşecek», dedi.
Yuqarı Radanıñ insan aqları vekâletlisi Lüdmila Denisovanıñ malümatına köre, Rusiyede 113 Ukraina vatandaşı apiste tutula, 89 – qırımtatarıdır.
Ukraina prezidenti Volodımır Zelenskıy oktâbrniñ 1-nde Kyivde keçirilgen brifingde Minskte keçirilgen üç taraflı bağ gruppasınıñ toplaşuvında ukrainalı esirlerni azat etüvniñ ekinci basamağı muzakere etildi, dep bildirdi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
