Eski Qırımda noyabrniñ 22-nde yerli sakin, qırımtatar faali Riana Kulametovanıñ 2011 ve 2013 seneleri paylaşqan videoları içün tayinlengen para cezası ödendi. Bu aqta «Qırım birdemligi» cemaat birleşmesi haber ete.
Cemaat imayecisi Mustafa Seydaliyevniñ aytqanına köre, 1000 rublelik para cezası «Qırım marafonınıñ» parasından ödendi, adet üzre on rublelik kapikler qullanıldı.
«Para cezasınıñ ödenmesinde bir özüm degilim, büyük destek ve yardım alam», – dedi Riana Kulametova.
Riana Kulametovanıñ Qırım.Aqiqatqa bildirgenine köre, «VKontakte» ağında qayd etken videolar arasında Eski Qırımdaki Oraza bayramı ve Aqmescitteki miting bar edi. Bu levhalarda arap urufatında yazuvlı şiarlar körüne. Mahkeme bunı «Hizb ut-Tahrir» bayraqları olaraq tanıp, Rianağa «yasaqlanğan teşkilâtnıñ timsallerini açıq numayış etkeni içün» biñ ruble para cezasını berdi.
Kulametova mahkeme qararına razı degil. Onıñ aytqanına köre, bayraqlar yasaqlanğan teşkilâtnıñ timsalleri degil, basma üstünde «Allahtan ğayrı Tañrı yoqtır. Hazreti Muhammed Onıñ Peyğamberidir», dep yazılğan.
2017 senesi iyül ayında «Qırım birdemligi» birleşmesi «Qırım marafonı» adı altında para toplaycağını ilân etken edi. Bunıñ maqsadı Qırımdaki siyasiy mabüslerge ve cemaat faallerine qoltutmaqtır.
Aktsiyada «lâqayt qalmağanlarnıñ birligini» köstermek içün Rusiyeniñ 10 rublelik (tahminen 4 ğrıvnâ – QA) pulları toplana.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
