Rusiye kontrolindeki Qırımnıñ İslâm Terek rayon mahkemesi «Eski Qırım» mustaqil musulman cemiyetine yasaqlanğan edebiyatnı saqlağanı içün 100 biñ ruble para cezasını berdi. Bu aqta «Qırım birdemligi» cemaat birleşmesi haber ete.
Said Nursiniñ «Risale-i Nur» «Munacat». Üçünci ışıq» kitabı ve Takiuddion an-Nabhaniniñ «İslâm sisteması» kitabı aqqında aytıla. Ekisi de Rusiye mahkemeleriniñ qararlarınen Ekstremist kitaplar cedveline kirsetilgen edi.
«Bu kitaplar camige qaydan keldi – haberimiz yoq», – dep bildirdi cemiyet reisi İdris Yurdamov.
İmaye tarafı mahkeme qararına razı olmayıp, oña itiraz bildirmege niyetlene.
«Uquq bozuluvınıñ alâmetlerinden biri kütleviy saqlav ola. Mahkeme saqlavnı yañlış izaatlap, kitapnıñ bir nushası olsa bile, saqlav sayıla, dep bildire, amma bu yañlış», – dep qayd etti uquqçı Rustem Kâmilev.
İmayeci bildirgenine köre, «Eski Qırım» cemiyeti qanunğa köre areket ete ve qanunğa köre qayd etildi. Olar Eski Qırımdaki «Az-Zubeyr» camisinde dua ve bayram namazlarını keçire ediler.
«2023 senesi noyabr ayında cami Qırım musulmanları diniy idaresine keçti ve teşkilâtnıñ problemleri başladı», – dedi Kâmilev.
Fevralniñ 29-nda saba Eski Qırım ve Juravki köyünde Rusiye quvetçileri dört qırımtatarınıñ - Lenur Yakubov, İzet Sayfulin, İdris Yurdamov ve Şevket Kiyamovnıñ evlerinde tintüv keçirdi. Bundan ğayrı, Eski Qırım şeeriniñ camisinde tintüvler keçirildi.
Tintüvler neticesinde Eski Qırımdan faaliyetçi ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfulinniñ tutuluvı aqqında haber etildi. İdris Yurdamov ve Şevket Kiyamovnı Rusiye quvetçileri evlerinde qaldırdı. Memuriy protokollar daa tizilmegen edi.
Daa soñra belli oldı ki, Sayfulinni polis bölüginden yiberdiler. Oña qarşı «qanunsız missionerlik faaliyeti» içün memuriy protokol tizildi. Bundan ğayrı, Lenur Yakubovğa qarşı memuriy protokol tizildi, Rusiye mahkemesi onı 14 künge apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
