Qırımda Rusiyeniñ «E» ekstremizm ile küreş merkezi tintüvler keçirilgen künden aman-aman bir ay keçken soñ «Eski Qırım» mustaqil musulman cemiyetinden yasaqlanğan edebiyat saqlanğanına dair memuriy protokol tizdi.
Bu aqta «Qırım birdemligi» cemaat birleşmesi haber ete, olarnıñ elinde işbu protokolnıñ kopiyası bar.
Faaller yazğanına köre, «E» Merkeziniñ hadimi P.A.Kazâyev Eski Qırımdaki «Zubeyr Cami» «Eski Qırım» din cemiyetinen bağlı, dep qayd ete. Fevralniñ 29-nda keçirilgen tintüv vaqtında yasaqlanğan edebiyat cedvelinden kitaplar alınğan eken. Said Nursiniñ «Risale-i Nur» «Munacat». Üçünci ışıq» kitabı ve Takiuddion an-Nabhaniniñ «İslâm sisteması» kitabı aqqında aytıla. Ekisi de Rusiye mahkemeleriniñ qararlarınen Ekstremist kitaplar cedveline kirsetilgen edi.
Rusiye uquq qoruyıcıları qayd etkenine köre, «Eski Qırım» cemiyeti «ekstremist malümatlarnı tarqatmaq maqsadınen kitaplarnı saqladı» ve böyle malümatnıñ azırlanması ve tarqatılması maddesini bozdı.
«Qırım birdemligi» yazğanına köre, protokol cemiyet reisi İdris Yurdamovğa tizildi. Vesiqada o, protokolnen razı olmağanını, cemiyetniñ ise «Zubeyr Camige» bir alâqası olmağanını añlattı.
«Kitaplar bizim degil. Camige qaydan keldi – haberimiz yoq», – dep yazdı Yurdamov.
Fevralniñ 29-nda saba Eski Qırım ve Juravki köyünde Rusiye quvetçileri dört qırımtatarınıñ - Lenur Yakubov, İzet Sayfulin, İdris Yurdamov ve Şevket Kiyamovnıñ evlerinde tintüv keçirdi. Bundan ğayrı, Eski Qırım şeeriniñ camisinde tintüvler keçirildi.
Tintüvler neticesinde Eski Qırımdan faaliyetçi ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfulinniñ tutuluvı aqqında haber etildi. İdris Yurdamov ve Şevket Kiyamovnı Rusiye quvetçileri evlerinde qaldırdı. Memuriy protokollar daa tizilmegen edi.
Daa soñra belli oldı ki, Sayfulinni polis bölüginden yiberdiler. Oña qarşı «qanunsız missionerlik faaliyeti» içün memuriy protokol tizildi. Bundan ğayrı, Lenur Yakubovğa qarşı memuriy protokol tizildi, Rusiye mahkemesi onı 14 künge apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
