Rusiye Federatsiyası kontrolindeki Qırımnıñ İslâm Terek rayon mahkemesi «Eski Qırım» mustaqil musulman cemiyetine «ekstremist malümatlarını» tarqatqanı içün 400 biñ ruble para cezasını berdi. Bu aqta iyulniñ 8-nde «Qırım birdemligi» cemaat birleşmesine cemiyetniñ menfaatlarını mahkemede temsil etken uquqçı Nazim Şeyhmambetov bildirdi.
Uquqçınıñ aytqanına köre, iyünniñ başında Eski Qırımdaki «Zubeyr-Camide» Rusiye qanunlarınen yasaqlanğan edebiyat tapılğan. Lâkin imaye tarafı video qaydlarında Rusiye uquq qoruyıcılarınıñ binağa operativ-qıdıruv tedbirleri başlamazdan evel kirgeni bar, dep mahkemeniñ diqqatını celp etti. Bir qaç kişi anda saba saat 6:50-de kirdi, protokolda ise operativ-qıdıruv tedbirleri saba 7-de başladı, dep aytıla. Bu videolar davağa qoşuldı.
«Qaydlarda körüne ki, kirgenler elektrik energiyasınıñ keskiçini söndürdi, yani camini elektriksiz qaldırdı, birisi zalğa kirdi, soñra daa bir hadimnen beraber bir şeyge köstereler. Çoq şey tahmin etile bile, [uquq qoruyıcılar anda ne yaptı]. Tek bundan soñ hadimler camiden çıqtı, operativ-qıdıruv tedbirleriniñ iştirakçileri, cemaatçılıq ve [cami] adamını davet etti ve [âsaqlanğan] edebiyatnı tapqan. Operativ-qıdıruv tedbirleriniñ ciddiy bozuluvı bar. Lâkin mahkeme bu delillerni red etip, tedbir vaqtı ve yerini tasdıqlamaq mümkün degil, dep bildirdi», – dep tarif etti Nazim Şeyhmambetov.
Uquqçı mahkemede «Eski Qırım» mustaqil din cemiyeti Eski Qırımdaki «Zubeyr-Caminiñ» saibi degil, dep qayd etti. Anda olğanlardan da mesüliyetli olamaz.
Rusiye mahkemesi din cemiyetine kene de 400 biñ ruble para cezasını berdi.
İyünniñ başında Rusiye uquq qoruyıcıları «Eski Qırım» mustaqil musulman cemiyetiniñ reisi İdris Yurdamovğa memuriy protokol tizilgenine dair haber berdi. Onı «ekstremist malümatını saqlağanından» şübheli sayalar.
Qayd etilgenine köre, iyünniñ 5-nde «E» Merkeziniñ hadimleri «Zubeyr-Camige» kelip, binanı baqqan ve «standart bir teşkerüv» olğanını aytqanlar.
2024 senesi martnıñ soñunda Qırımnıñ İslâm Terek rayon mahkemesi cemiyetke aynı «ekstremist malümatlar» maddesine istinaden 100 biñ ruble para cezasını bergen edi. Mayısta ise Rusiye kontrolindeki Qırımnıñ Yuqarı mahkemesi bu qararnı tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
