Eski Qırımdaki poligonda yüz bergen patlavlardan soñ RF quvetçileri qırımtatarlarnıñ evlerine kelip soravlar keçirmege başlağan. Bunı "QırımSOS" uquq qoruyıcı teşkilâtı bildire.
Bundan ğayrı, uquq qoruyıcılarnıñ bildirgenine köre, Rusiye FSB-sı ve polisi Keriç köpründen keçken er kesniñ vesiqalarını teşkere eken.
İyülniñ 19-nda Qırımnıñ İslâm Terek rayonındaki Kriniçki köyü yanında Eski Qırım poligonı yana dep haber etilgen edi. Yerli telegram kanallarınıñ malümatına köre, anda silâlar, arbiy yedekler patlay edi. Olarnıñ malümatına köre, patlavlarnıñ sebebi üç ücüm ola bile edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
