Aqyarlı yaldayıcı marafoncı, sovet dissidenti Oleg Sofânik Ukraina prezidenti Volodımır Zelenskıyge muracaat etip, işğal etilgen Qırımnı terk etmesine yardım etmesini rica etti. Bu aqta Sofânik Qırım.Aqiqatqa bildirdi.
«Prezident Volodımır Zelenskıyge elektron poçta vastasınen ariza yolladım. Çıqmağa (Qırımdan esas Ukrainağa – QA) isteyim, amma memuriy sıñırda ne olacağını bilmeyim. Anda narkotik ve silâ gizliden qoyula bile. Memuriy sıñırda meni er vaqıt teşkereler: bir qaç saat tutalar, işançsız insanlar cedvellerinde, FSB malümat bazalarında bulunam. Ukraina meni vatandaşı olaraq qorçalasın, mından (işğal etilgen Qırım aqqında aytıladır – QA) niayet ketip olurım, dep ümüt etem», – dep añlattı Sofânik.
Fevralniñ 11-nde Oleg Sofânikniñ Qırım.Aqiqatqa bildirgenine köre, o, çağırılğan Aqyar psihiatrik hastahanesinde qalmaqtan qorqa. 2019 senesi noyabrniñ 14-nde Rusiye quvetçileri Oleg Sofânikni Qırım ve Herson vilâyetiniñ memuriy sıñırında tuttı. Bundan evel o, Lukull limanından (Qırımnıñ ğarbinde) Aqyardaki Ömega körfezine yaldadı. 30 km mesafeni 10 saat içinde yaldadı – raatlanmayıp ve bir özü olıp. Bunı Sofânik qırımtatar sürgünliginiñ 75 yılına bağışladı.
Oleg Sofânik – meşur aqyarlı yaldayıcı marafoncı, Ukraina rekordları kitabınıñ rekordçısıdır. 2012 senesi mayıs ayına qadar Sofânik 50 marafonda yaldadı, eñ uzunı 350 km Cenübiy-Qıtay deñizinden edi.
Sofânik Aq deñiz, Marmara deñizi, İstanbul boğazını, Çanaqqale boğazını yaldap keçti. Qırım yalısında 100 kilometrge qadar marafonlarda iştirak etti. Qışta suvuq suvda da yaldağanınen bellidir.
Aqyarlı dissident ola. Askerlikten ve Sovetler Birliginiñ vatandaşlığından vazgeçkeni içün onı psihiatrik tedaviylevge mecbur etken ediler.
