Qırımtatar Resurs Merkeziniñ idare reisi Eskender Bariyev Rusiye uquq qoruyıcılarınıñ 2024 senesiniñ başından qullanğan yerli faaller ve Qırımtatar Milliy Qurultayı ve Meclisinen alâqası olğanlarnı taqip etüv yañı usulları aqqında ayttı.
«Böyle usullarnı qullanalar: insanlar qomşu, soy-sop, yaqınlarına haber etip olamasın dep, ya gece keleler, ya da insannı hırsızlaylar. Amma aynı vaqıtta tenbilep aytalar: «Bunı kimsege aytmasañız, yaqınıñız azatlıqta olacaq», – dedi Bariyev «Suspilne. Studiya» yayınında.
Onıñ aytqanına köre, 2024 senesi fevral ve mart aylarında Rusiye uquq qoruyıcıları yerli ve regional Meclis, Qurultay, Qırımtatar Milliy Qurultayınıñ Merkeziy saylav komissiyasınen alâqası olğanlarğa kelip, faal sürette tintüvler keçire ediler.
«Tutuvlar aqqında malümatımız az ola bile, çünki BM Halqara mahkemesiniñ Ayırım şartnamesi qararını alğan soñ faaller ve Qurultay ve Meclis sistemasınen alâqası olğan insanlarnıñ evlerinde tintüvlerni quvetleştirdi», – dep qoştı Bariyev.
Qırımtatar resurs merkeziniñ malümatına köre, 2024 senesiniñ ilk üç ayı devamında Rusiye uquq qoruyıcıları Qırımda 33 tintüv keçirdi, 28-i qırımtatarlarnıñ evinde oldı. Bundan ğayrı, 41 insan tutuldı, 46 kişi sorğuğa çekildi, Rusiye uquq qoruyıcıları 43 insannen sorav ve «subet» keçirdi.
Qırımtatar resurs merkezi bildirgenine köre, bugünki künde 194 qırımlı siyasiy mabüs bar, 134-ü qırımtatarı ola.
Ukrayına prezidentiniñ Qırım Muhtar Cumhuriyetindeki temsilciligi bildirgenine köre, 2024 senesi fevralniñ 19-nda Rusiye 208 qırımlı mabüsni apiste tuta, 125-i – qırımtatarıdır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
