Ukrayina ve Rusiye "1000-ge 1000" formatında esir deñişüviniñ ilk etapını keçirdiler, dep bildirdi Ukrayina prezidenti Volodımır Zelenskıy mayısnıñ 15-nde:
"205 ukrayinalı evde. Bugün Ukrayina Silâlı quvetleri, Milliy gvardiya ve Devlet sıñır hızmetiniñ arbiyleri Rusiye esirliginden qayta. 1000-ge 1000 deñişüviniñ ilk etapı".
Onıñ qayd etkenine köre, arbiylerniñ ekseriyeti daa 2022 senesinden berli Rusiye esirliginde edi. Olarnıñ arasında Mariupolni imaye etkenler ve Donetsk, Lugansk, Harkiv, Herson, Zaporijjâ, Sumı, Kyiv yönelişlerinde uruşlarnıñ iştirakçileri bar.
"İnsanlarımıznıñ evlerine qaytması içün çalışqan er keske, birinciden Ukrayina içün deñişüv fondunı toldurğan arbiylerimizge ve taqımımızğa teşekkürler bildirem. Ukrayinalılarnı esirlikten azat etmege yardım etken bütün ortaqlarımızğa minnetdarım", – dep qoştı Zelenskıy.
Cenk esirlerinen munasebet koordinatsion ştabı bildirgenine köre, azat etilgenlerden biri milliy gvardiyadan, Çernobıl atom elektrik stantsiyasında esir tüşken edi. Eñ yaş arbiy 21 yaşında, eñ büyügi – 62 yaşında.
"Azat etilgen İmayeciler kerekli tibbiy teşkerüv, tedaviylev ve tibbiy reabilitatsiya içün tibbiy merkezlerge ketirilecek. Kerekli yardımnen temin etilecek, vesiqa ve para alacaq", – dep bildire ştab.
Müessise haber etkenine köre, "1000-ge 1000" deñişüviniñ nevbetteki etapları planlaştırıla.
ABD prezidenti Donald Trump mayısnıñ 8-nde aqşam bildirgenine köre, Rusiye ve Ukrayina arasında üç künlik – mayısnıñ 9, 10, 11-nde – barışıq añlaşması aqqında bildirdi. Onıñ aytqanına köre, em uruş areketleri toqtatılacaq, em 1000-ge 1000 formatında esir deñişüvi olacaq. Kyiv ve Moskvada añlaşmalarını tasdıqladı.