Link açıqlığı

Saatnıñ esas haberi

Qırımda qırımtatar tili ocası Esfure Azizova vefat etti


Fikret Azizov anası Esfurenen, 2021 senesiniñ fotoresimi
Fikret Azizov anası Esfurenen, 2021 senesiniñ fotoresimi

Bağçasaray rayonınıñ Kokluz (Bogatoye Uşçelye) köyünde qırımtatar tili ve edebiyat ocası Esfure Azizovanen vedalaştılar. Bu aqta aq qorçalayıcı Mümine Saliyeva Facebookta bildirdi.

Onıñ aytqanına köre, Esfure Azizova 80 yaşında vefat etti. 1944 senesi onı tuvğanlarınen Qırımdan Rusiyege sürgün ettiler, soñra Özbekistanda yaşadılar.

Esfure Azizov 1988 senesi Qırımğa qayttı. Qorantası Canköy rayonınıñ Mayskoye köyüne yerleşti. İşke kirgen mektepte qırımtatar tili ocası oldı. Azizova Canköy rayonınıñ Zareçnoye ve Qalay (Azovskoye) köylerinde qırımtatar mektepleriniñ açılış temelinde turğan edi.

Qırımda mahküm etilgen qırımtatar siyasetçisi ve faali Nariman Celâl Esfure Azizova onıñ ocası edi, dep qayd etken edi.

«Qırımtatar tili ve edebiyatı ocam Azizova Esfure hanım tanış olğanımıznıñ ikâyesini tarif etmege seve edi. Beşinci sınıfta ilk derslerden birinde eki aldım. Nevbetteki derske barmadım. (O vaqıt ana tilimni pek yahşı bilmey edim). Meni mektep koridorında tapıp, eki qorqulacaq bir şey degil, soñ degil, dep añlattı ve tırışsam, onı mıtlaqa tüzetir, dep ayttı», – dep ayta Celâlnıñ aytqanlarını Mümine Saliyeva.

Qırımtatar sürgünliginden evel Bogatoye Uşçelyeniñ adı Kokluz edi. Bağçasaray rayonında bulunğan bir köy. Köyge dülber manzaları bir yol kete, evlerniñ yanında orman, göl, özen ve uçansuv bar. Tamır halq sürgün etilgen soñ bu köy coğrafik haritalardan ğayıp ola bilir edi. Şimdi anda tek bir soqaq bar – Gornaya soq. Kokluzda tahminen 40 aile yaşay.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG