Ukraina Devlet sıñır hızmeti Rusiye FSBsiniñ işğal etilgen Qırımnıñ memuriy sıñırda 60 kilometrlik qora qurulğanına dair beyanatını izaatladı.
«Bunıñnen bağlı malümatım yoq. O, (qora – QA) körünmey. İçindedir», – dedi Ukraina Devlet sıñır hızmeti yolbaşçısınıñ yardımcısı Oleg Slobodân Qırım.Aqiqatqa.
Dekabrniñ 28-nde saba Rusiye kütleviy haber vastaları bildirdi ki, Qırımnıñ şimalinde Rusiye uquq qoruyıcıları bir qaç inşaat çeşitinden, şu cümleden video nezareti ve teplovizordan ibaret qora qurdı.
FSB, qora «diversion-istihbarat gruppalarınıñ keçme ıntıluvları, cinayetçiler tarafından sıñırdan silâ, patron ketirilmesi, tütün ve içki malları, narkotik, küçlü tesirli maddelerniñ taşınmasına» yol bermemek içün quruldı.
Kütleviy haber vastalarınıñ malümatına köre, qora qurucılığına Rusiye bücetinden 212,9 mln ruble ayırıldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
