Esas Ukrainadan işğal etilgen Qırımğa kirgen bütün insanlarnıñ sıcağını Rospotrebnadzor hadimleri teşkere, bundan soñ Krasnoperekop rayonınıñ baş sanitar ekimi Yuriy Sirotkin adından 14 künlik tecrit qararını yazalar. Bu aqta Qırım.Aqiqat mühbiri bildire.
Vesiqağa köre, insanlarğa yaşağan yerlerini terk etmege, işke, oquşqa, tükân, aphanege barmağa, cemaat naqliyatını qullanmağa ve üçünci şahıslarnen bağda olmağa yasaq etile.
Bu qararnı bozğanlar 100-den 500 rublege qadar para cezasını ala bile.
Qırım.Aqiqat mühbiriniñ bildirgenine köre, martnıñ 30-ı 00:00-dan soñ kelgenlerni Rusiye sıñırcıları Qırımdan çıqarmadı, Ukraina pasportı ve Qırım qaydı olğan insanlar Qırımğa kirsetilmedi.
Rusiye sıñırcılarınıñ Qırım.Aqiqat mühbirine bildirgenine köre, Rusiye pasportı olğan qırımlılar işğal etilgen Qırımğa şimdilik kirsetilmeycek.
Hatırlatamız, 2020 senesi martnıñ 28-ne qadar Qırım yarımadasında 20 koronavirus hastası qayd etildi: 15 – Qırımda ve 5 – Aqyarda.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
