Qırımtatar faali Ervin İbragimov hırsızlanğanınıñ 3 yılı munasebetinen mayısnıñ 24-nde Bağçasarayda şeer camilerinde dualar yapıldı. Bu aqta Qırım.Aqiqat mühbiri haber ete.
«Bugün bütün Bağçasarayda dua yapıldı, insanlar mubarek Ramazan ayında Allahqa dua etip, Ervinniñ yaqın vaqıtta evge qaytmasını istedi. Cinayetçiler tarafından hırsızlanğan diger semetdeşlerimizniñ ya da sebepsiz azatlıqtan marum etilgenlerniñ evge qaytmaları istenildi», – dep tarif etti uquqçı Nazim Şeyhmambetov.
Onıñ bildirgenine köre, üç yıl devamında dava büyük diqqat celp etse de, tahqiqat organları «semereli bir tahqiqat keçirmey, dava malümatları ise «emiyeti olmağan» vesiqa ve İbragimov hırsızlanğan maşina fotokopiyalarınen tolu». Şeyhmambetovnıñ fikirince, tahqiqat davanı «quruta».
Toplaşqan insanlar Ervin İbragimov aqqında yahşı ayta ve qaytacağına ümüt etmege devam ete.
«Er kün ev balkonından baqıp, Ervinniñ daire pencerelerini körem. Er özüme aynı sual berem: Ervin qayda? Ana-babasına baqmağa pek qıyın, hususan anasına. Ervin bizge de pek kerek. Er vaqıt yanımızda olıp, yardım etken, yardımğa kelgen edi», – dep tarif etti qırımtatar milliy areketiniñ faali, siyasiy mabüs Seyran Saliyevniñ anası Zodiye.
Ervinniñ babası Umer İbragimov insanlarğa destek köstergenleri ve lâqayt qalmağanları içün teşekkürler bildirdi.
«Bağçasaraynıñ bütün camilerinde dua yapqan Ervinniñ dostlarına pek minnetdarım. Ervin içün, Ervin adından, hırsızlanğan ve apishanelerdeki siyasiy mabüsler içün. Er kes sağ olsun ve tezce evge qaytsın. Adalet yeñsin», – dedi Umer İbragimov.
Bağçasarayda 2016 senesi mayısnıñ 24-nde aqşam şeer şurasınıñ deputatı, Dünya Qırımtatar Kongressi icra komitetiniñ azası Ervin İbragimov hırsızlanğan edi. Onıñ maşinası yol ortasında tapıldı. Ğayıp olğan kişi mayısnıñ 25-nde Meclis azalarınen beraber Sudaqqa baracaq edi, anda qırımtatar faalleriniñ mahkemesi planlaştırılğan edi.
Qırımtatar faali Nariman Celâl tutulğanını video nezareti kameraları qayd etti, dep bildirdi. Video uquq qoruyıcı organlarına berildi.
«Videoda, onı körgenlerniñ aytqanlarına köre, yol patrul hızmetiniñ urbasında insanlar bar, olar Ervin İbragimovnı toqtatıp, maşinadan alalar ve diger avtobusqa mindireler, ondan soñ ise keteler», – dep aytqan edi Celâl 2016 senesi.
Daa soñra Ervin İbragimovnı Bağçasarayda tutuv videosını kütleviy haber vastaları derc etti.
Ğayıp olğan insannıñ babası yarımadanıñ Rusiye prokuraturasına ariza berip, oğlunı qıdırmağa rica etti.
Qırım Muhtar Cumhuriyetiniñ prokuraturası Ervin İbragimovnıñ ğayıp olmasınen bağlı mahkemeden evel tahqiqat keçirmekte.
Qırım aq qorçalayıcı gruppası İbragimovnı Rusiye akimiyeti ya da onıñ kontrolindeki gruppalar hırsızladı, dep tahmin ete.
Kyivde Ervin İbragimovnıñ ğayıp olğanını hatırlatmaq içün er ay «Ervin qayda?» aq qorçalayıcı aktsiyaları keçirilmekte.
