Rostov-na-Donu Cenübiy okrugınıñ arbiy mahkemesinde qırımtatar faali, «qırımlı musulmanlar davasınıñ» mabüsi Ernest Seytosmanovnıñ davasında tilşınas çıqışta bulundı. Bu aqta «Qırım birdemligi» aq qorçalayıcı teşkilâtı haber ete.
«Mahkeme eksperti Yelena Novojilova mahkemeden tış tilşınaslıq tedqiqatını keçirdi. Onıñ fikirince, incelengen ses qaydlarında «zorbalıqqa ya da terror faaliyetine çağıruv yoq edi», – dep aytıla haberde.
Mahkemede şaat olaraq 11 yılğa sert rejimli koloniyada qalmasına üküm etilgen Yaşar Şihametov da sorğuğa çekildi. O, «Seytosmanovnıñ terrorizmnen alâqası yoq ve namuslı, Allahtan qorqqan bir musulman ola», dep ayttı.
Martnıñ 23-nde olacaq toplaşuvda imaye Seytosmanovnı sorğuğa çekmege planlaştıra. Soñra taraflarnıñ munaqaşası olacaq.
Seytosmanov 2022 senesi fevral ayında keçirilgen tintüvlerden soñ tutuldı. O vaqıt Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terrorist tanılğan, amma bir çoq memlekette milliy qanunlar seviyesinde sıñırsız çalışqan «Hizb ut-Tahrir» siyasiy firqasında iştirak etkeninde qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
