Qırımlı vatandaş jurnalisti Ernes Ametov Rusiyeniñ Vologod vilâyetindeki №12 tüzetüv koloniyasına etap etildi. Bu aqta o, ömür arqadaşı Eleonora Ametovağa «Zonatelekom» Rusiye apishane bağı vastasınen haber etti, dep yaza «Qırım birdemligi» cemaat birleşmesi.
«Al-azırda o, karantinde buluna ve onı lagerge qaytaracaqlarını bekley. Mesafe uzun oldı – Qırımdan eki biñ kilometr», – dep bildire Eleonoranıñ aytqanlarını «Qırım birdemligi».
Ernes Ametov 2017 senesi oktâbrniñ 11-nde Seyran Saliyev, Marlen Asanov, Timur İbragimov, Server Zekiryayev ve Memet Belâlovnen beraber tintüvlerden soñ tutuldı. 3 yıl devam etken tahqiqat ve mahkemelerni qırımlı Qırım ve Rostov-na-Donu tahqiqat izolâtorlarında keçirdi.
2020 senesi onı aqlap, deliller yetmegeni içün mahkemede azat ettiler. «Hizb ut-Tahrir davasında» böyle bir vaqia em işğal etilgen Qırımda, em qomşu Rusiyede ilk oldı. Lâkin 2022 senesi mart ayında istinaf mahkemesi Cenübiy okrugınıñ arbiy mahkemesi çıqarğan qararnı yañıdan baqıp, davanı yañıdan baqılmasına yolladı.
2022 senesi dekabr ayında Rusiyeniñ Rostov-na-Donudaki Cenübiy okrugınıñ arbiy mahkemesi Ametovğa qarşı davanıñ tekrar baqıluvı neticesinde onı 11 yıl sert rejimli koloniyada qalmasına üküm etti.
Bıltır dekabr ayında Rusiyeniñ Vlasihadaki İstinaf arbiy mahkemesi Ernes Ametovnıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
