Erivan, Azerbaycan Silâlı quvetleri Ermenistan şimalindeki Vardenis şeeriniñ arbiy bölügine ateş açtı, dep bildirdi, dep haber ete Azatlıq Radiosı.
Ermenistan Mudafaa nazirligi bildirgenine köre, Azerbaycan tarafı bu arbiy bölükke ateş açtı ve ava quvetlerini qullandı. Müessiseniñ resmiy vekili Artsrun Ovannisân Vardenisteki vatandaş obyektlerine ücüm etilgenini bildirdi, dep haber ete TASS.
«Azerbaycan Silâlı quvetleriniñ pilotsız cihazı ücüm etken soñ şeerde vatandaş avtobusı yana», – dep yazdı Ovannisân Facebookta. Onıñ aytqanına köre, Ermenistanğa açılğan ateş neticesinde yaralanğanlar yoq.
Ermenistan Tış işler nazirliginiñ salı künü bildirgenine köre, Azerbaycan Silâlı quvetleri Vardenis rayonınıñ arbiy ve vatandaş infrastrukturasına ateş açtı ve bir yerli sakin elâk oldı.
«Azerbaycannıñ region telükesizligini ve barışıqnı telükege oğratuv ıntıluvlarına Ermenistan Cumhuriyeti ve Artsah Cumhuriyeti (Dağlıq Qarabağ) belli arbiy-siyasiy cevabını berecekler», – dep aytıla Ermenistan Tış işler nazirliginiñ cevabında, dep haber ete Azatlıq Radiosınıñ Ermeni hızmeti.
Azerbaycan Mudafaa nazirliginiñ bildirgenine köre, Ermenistannıñ Vardenis rayonından Azerbaycan tarafına, Daşkesan rayonına ateş açıldı. Erivan bunı «yalan haber» dep adlandırdı.
Zıddiyet tarafları bir-birini ağır top qullanğanında ve vaziyetni kerginlişkeninde qabaatlay.
Uruşlar bazar künü, sentâbrniñ 27-nden, berli devam ete, uruşlar öz-özüni ilân etken Dağlıq Qarabağ cumhuriyetinde başladı. Baqu ve Erivan mesüliyetni bir-birine yükley. Qarabağ memuriyeti elâk olğan 86 ermeni asker ve bir qaç vatandaş aqqında bildirdi. Azerbaycan elâk olğanlar aqqında bildirmey ve ermeni reberliginden kelgen malümatnı tasdıqlamay. Baqu öz tarafında doquz sakin elâk oldı ve 30 kişi yaralandı, dep bildire.
BM Baş kâtibi António Guterres Ermenistan ve Azerbaycan liderlerine muracaat etip, cenk uruşlarını toqtatmalarına çağırdı. Salı künü ötkerilecek acele toplaşuvda vaziyetni BM Havfsızlıq şurasınıñ azaları muzakere etecek. Diger memleketlerniñ siyasetçileri de, hususan AB, ABD ve Rusiye Qarabağ zıddiyetiniñ taraflarını uruşlarnı toqtatmalarına çağırdı.
Dağlıq Qarabağ sebebinden Ermenistan ve Azerbaycan arasındaki zıddiyet 1988 senesi başladı. Ateş toqtatılmasına dair añlaşma tizilmesinden evel Baku Dağlıq Qarabağdaki ve memleketniñ bir qaç rayonındaki kontrolini coydı – halqara seviyede tanılğan topraqlarnıñ 20%-na qadar. Ateşkes rejimi 1994 senesi mayısta başladı.
Buña baqmadan Ermenistan öz-özüni ilân etken Dağlıq Qarabağ cumhuriyetine arbiy yardım köstere, resmiy şekilde ne o, ne de dünyanıñ diger memleketi Dağlıq Qarabağnıñ mustaqilligini qabul etmey.
Azerbaycan öz-özüni ilân etken Dağlıq Qarabağ cumhuriyetini zıddiyet tarafı saymay ve muzakere keçirmege istemey.
Bu sefer zıddiyetniñ kerginleşmesi 2016 senesinden berli eñ büyük oldı.
