Azerbaycan prezidenti İlham Aliyev Rusiye, ABD ve Frenkistannı Dağlıq Qarabağdaki zıddiyetni al etüv ıntıluvlarına devam etmege çağırdı. Bu memleketler OSCEniñ regiondaki zıddiyetni al etüv Minsk gruppasına kire, dep haber ete Azatlıq Radiosı.
«Bu üç memleket Dağlıq Qarabağdaki zıddiyetni al etmek içün çalışmağa devam etmeli, amma tarafsız qalmaları şarttır», – dedi Aliyev Al Jazeera intervyüsında.
Bunı o, Minsk gruppasınıñ telefon muzakerelerini alğışlağan Ermenistan Tış işler nazirliginiñ mesacından ertesi künü ayttı. Ermenistan, OSCE vastasınen barışıq muzakerelerge azır, dep bildirdi.
Minsk gruppası Ermenistan ve Azerbaycan liderlerini «yahşı niyetli ve şartsız muzakerelerni ğayrıdan tiklev vazifesini acele boynuna almalarına» çağırdı.
Azerbaycan ve Ermenistan arasındaki zıddiyetniñ faal fazası sentâbrnñ 27-nde başladı. Bir qaç künde, farqlı malümatqa köre, onlarnen ya da yüzlernen insan elâk oldı. Taraflar vatandaşlar can bergenini bildirip, bir-birini ağır silâ ve yalçı qullanğanında qabaatlay.
1988 senesi Dağlıq Qarabağda (o vaqıt – Azerbaycan Sovet Sotsialistik Cumhuriyetiniñ Dağlıq Qarabağ muhtar cumhuriyeti) o vaqıt Ermenistan SSCke qoşulmağa istegen ermeni ealisiniñ mitingleri olıp keçti. Baqu buña razı olmadı.
1992-1994 seneleri taraflar uruştı. Azerbaycan Qarabağ ve oña yañı rayonlardaki kontrolini coydı – umumen memleket topraqlarınıñ tahminen 20%-ını. Regionnı aman-aman bütün azeriler ve on biñlernen diger millet qaçaqları terk etti.
