Yerevanda sentâbrniñ 22-nde Rusiyeniñ apishanelerinde siyasiy mabüs qırımtatarlarğa bağışlanğan mektüpler aqşamı olıp keçti, onı Letters of Freedom teşkilâtı teşkil etti. Bu sefer onı bu sene sentâbrniñ 22-ne rastkelgen qırımtatarlarnıñ Derviza bayramına bağışladılar. Mektüpler Tumanân soqağındaki Letters and Numbers kovorking qavehanesinde yazılğan.
"Rusiye siyasiy mabüslerine yazılğan mektüpler aqşamlarında çoqtan iştirak etem, ve Rusiyede ksenofobiya seviyesi artqanını közetem. Hususan tamır halqqa qarşı basqılarnı közetem. "Rus olmağan" soyadlı politsiya hadimlerine siyrek yazılğanını qayd ettim. Olarğa yazmağa tırışam. Bundan da ğayrı, adresler cedvelinde tanımağanım bir soyadnı körsem, o adamğa yazam. Büyük ihtimal ile, onıñ aqqında kütleviy haber vastaları pek az bildire, ve, ğaliba, oña kimse yazmay", — dep ayta Siyasiy sebeplerden Nijniy Novgoroddan Ermenistanğa köçken tarihçı ve içtimaiy beşeriyatşınas Anna Grebennikova.
Aqşamnıñ başında o, "Qırımtatarlar ve olarnıñ medeniyeti" lektsiyası ile çıqışta bulundı. Esas diqqatnı qadimiy tarihqa ve bu etnosnıñ şekillenmesine celp etti, yaqında olğan vaqialar aqqında da ayttı.
"Qırımtatarlar soñki yüz yıl içinde defalarca repressiyalarğa oğratıldı. Stalin sürgünligini, açlıqnı başından keçirdiler. Tabiiy ki, bugünki repressiyalar tarihiy hatırağa tesir etti. Olar qarşılıq köstere, çünki repressivlar altına kene tüşmek istemeyler", — dep ayta Anna.
Aqşam iştirakçileriniñ masalarında qırımtatar siyasiy mabüsleriniñ cedvelleri bar edi. Çoqusı Qırım ilhaqı ve Rusiyeniñ Ukrayinağa istilâsı arasında apiske alındı. Rusiye mahkemeleri olarnı terror teşkilâtında iştirak etüvde, akimiyetni zorbalıqnen zapt etmege azırlanuvda, Rusiyede yasaq etilgen "Hizb ut-Tahrir" teşkilâtında iştirak etüvde qabaatlı tanıdı. Apiske alınğanlar 12 yıldan 19 yılğa qadar apis cezasını çeke.
Letters of Freedom koordinatorı Aleksandr Mişuk qırımtatarlarğa qarşı siyasiy davalarnı uydurılğan dep saya.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
