Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, soñki aftada yarımadağa çetelden kelgen yedi insannıñ COVID-19 diagnozı tasdıqlandı.
Bu aqta o, martnıñ 17-nde koronavirus yuqunçı ile küreş operativ ştabınıñ toplaşuvında ayttı.
«Qırımğa kelgen yedi insannıñ yañı koronavirus yuqunçı qayd etildi. Bu şahıslar Ermenistan, İspaniya, Iraqtan keldi – bu üç insan ve dört insan Ukrainadan maşina keçiş noqtalarından keldi. Episi tibbiy közetüv altına alındı. Büyük Britaniyadan kelgenler – soñki aftadan 4 kişi – İç işler nazirligine izolâtsiya rejimine riayet etmelerini kontrol etmek içün bildirildi», – dedi Penkovskaya.
Keçken künü Qırımda, yerli akimiyetniñ malümatına köre, 55 koronavirus hastası qayd etildi, bir künde 61 insan tüzeldi, epidemiya vaqtında 33 707 kişi yahşı oldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
