Fevralniñ 24-nde saat 5-te Rusiye Ukrainağa ücüm etti. Rusiye prezidenti Vladimir Putin Ukrainağa kerçekleştirgen ücümini Donbasta «DNR» ve «LNR» gruppirovkalarınıñ ricasınen keçirilgen mahsus operatsiya dep adlandırdı. O, Ukraina topraqlarını işğal etmek planları yoq dep, Ukraina askerlerini silânı teslim etip, «evge qaytmağa» çağırdı.
Bu beyanatnen aynı vaqıtta ya da tezden Kramatorsk, Berdânsk, Harkiv, Odesa, Kyivdeki patlavlar aqqında haber etildi. İç işler nazirligi, Ukrainanıñ bir qaç şeerinde tañ atqanda arbiy idare merkezleri, uçaq alanları, arbiy anbarlarğa raketa darbeleri qayd etildi, dep tasdıqladı. Sıñırda da ateş açılğanı haber etile.
Ukraina prezidenti Volodımır Zelenskıy «Ukrainada cenk vaziyetini ilân etüv» buyruğını imzaladı. Fermanğa köre, cenk vaziyeti 2022 senesi fevralniñ 24-nde saat 5:30-dan 30 künge ilân etile.
O, Rusiyeniñ Ukrainağa ücüm etkeni sebebinden dünya liderlerini Putinge qarşı koalitsiya qurmalarına çağırdı.