Qırım ve Herson vilâyeti arasındaki memuriy sıñırda Rusiye polisi "Rospotrebnadzor buyruğına uymağa istemegen" qadında cöreme belgiledi ve onı observatorğa yerleştirdi. Bunı aprelniñ 28-inde Rusiye İİN-niñ Qırım boyunca reberi bildirdi.
"Ermeni Bazardaki memuriy sıñırda 6.3 maddesiniñ 2-nci qısmına köre protokol tizildi. Qadın Rospotrebnadzor buyruğına uymağa istemedi", - dedi Smaglin.
Onıñ malümatına köre, qadınnı observatorğa yerleştirdiler.
Saba belli oldı ki, Qırımda daa doquz adam koronavirusnen hastalandı. Böylece, şimdilik Qırımda 79 koronavirus adisesi tasdıqlandı. Olardan 20-si çetelden ketirildi, 10-u Rusiyeden ketirildi, 49 adise - yerli adiselerdir. Aqyarda umumen 36 COVID-19 hastası bar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
