Ermeni Bazarda iyülniñ 5-ne şeerniñ Rusiye akimiyeti izin bergen narazılıq aktsiyasınıñ keçirilmesi planlaştırıla. Bu aqta Rusiye tarafdarı olğan faal Sergey Akimov Qırım.Aqiqatqa tarif etti.
Teşkilâtçılarnıñ malümatına köre, tedbir maqsadı – Şimaliy-Qırım kanalı üzerinden Qırımda suv teminleviniñ ğayrıdan tiklenmesidir.
İlânğa köre, miting vaqtında umumiy muracaatnı qabul etmege planlaştırıla. Anda Qırımnıñ sabıq prezidenti Yuriy Meşkovnıñ esas Ukrainadan Qırımğa suv qaytarılmasınen bağlı menfaatlarnı temsil etüv meselesi qayd etilip, sakinlerniñ imzaları toplanacaq.
İyünniñ başında Yuriy Meşkov Ukraina prezidenti Volodımır Zelenskıyge muracaat etip, yarımadağa esas Ukrainadan suv berilmesini ve demiryol hızmetini ğayrıdan tiklemege rica etti. Volodımır Zelenskıy ya da ofisiniñ vekilleri bu muracaatqa daa cevap bermedi.
1990-ıncı yıllarnıñ başında Yuriy Meşkov Qırımnıñ Cumhuriyet areketi ve «Rusiye» Blokunıñ yolbaşçısı edi, olar yarımadanıñ Ukrainadan mustaqil olmasına ve daa soñra Rusiye Federatsiyasına qoşulmasına qoltutqan ediler.
1994 senesi Qırımnıñ ilk ve soñki prezidenti olaraq saylanğan edi.
«Rusiye» blokundaki bölünüv ve Ukraina akimiyetiniñ areketleri neticesinde Rusiyege ketmege mecbur edi. Yarımada işğaline qadar anda yaşağan edi. Şimdi Kreml kontrolindeki Qırım akimiyetine muhalif ola.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
Ermeni Bazarda oktâbrniñ 20-nde «Qırım titanı» zavodı çalıştırmağa başladı. Onıñ işi avgustnıñ 23-nden 24-ne keçer gecesi taşlantılardan sebep toqtatılğan edi. Qırım akimiyeti bulaşuv sebebi «Qırım titanı» qullanğan ekşilik havzularından çıqqan buvlanuvı ola, dep bildirdi.
Kyiv, Qırımda himiyeviy taşlantılarnıñ avağa atılmasına Rusiye arbiyleri sebepçi olğan dep iddia ete, çünki olar idman yapqanda titan ve soda zavodlarınıñ taşlantılarına ateş açqan edi.
Qırımnıñ rusiyeli başlığı Sergey Aksönov, Ermeni Bazardan (Armânsk) mektep çağına yetmegen ve mektep çağındaki balalarnı avanıñ bulaşuvı içün Qırım sanatoriylarına yollacaqları aqqında haber etti.
«Qırım titanı» zavodı daa 1971 senesi işinibaşladı, 2000 senelerniñ başında ise, Dmıtro Firtaşnıñ Groop DF şirketiniñ nezareti altına keçti. İşhaneniñ esas yönelişi - titan dioksidiniñ istisalı. Titan dioksidi - lak, boya, rezina, plastmassa işlep çıqaruvında ve daa çoq başqa saalarda qullanılğan madde.
2014 senesi, Qırım işğalinden soñ, Dmitriy Firtaş, zavod idare etilmesiniñ terkibini deñiştirdi. Oktâbr ayında Groop DF, «Qırım titanı» şahsiy aktsiyalı şirketini (ŞAŞ) «Titan yatırımları» açıq aktsiyalı şirketine (AAŞ) berdi. 2015 senesi «Qırım titanı» ŞAŞı «Ukrainian Chemical Products» adını deñiştirdi.
