Ermeni Bazar şeer mahkemesi iyülniñ 23-nde qırımtatar halqınıñ lideri Mustafa Cemilevge qarşı cinaiy davanı temelden baqıp başladı, dep bildire Qırım.Aqiqat mühbiri.
İmayeniñ muracaatınen oturışuvğa dört diñleyici kirsetildi. Advokat dava malümatlarına prokurornıñ mahkemeni ğıyabiy şekilde keçirmek muracaatına itiraz bildirgenini qoştı, çünki tahqiqat onı tapmaq ve diger protsessual tedbirler keçirmek içün bir şey yapmadı.
Bundan ğayrı, imaye dava tahqiqatını toqtatmağa muracaat etti, çünki mahkeme esnası başlanğanda Rusiyede ve işğali altındaki Qırımda koronavirus yuqunçınıñ tarqaluvına yol bermemek içün çetel vatandaşlarınıñ kirişi sıñırlanğan edi. Faqat mahkeme bu muracaatnı qanaatlendirmedi.
Qadı Venera İsroilova imaye tarafına bir sıra vesiqanı ukrain tilinden rusçağa tercime etecek tercimannı davet etmege razı olmadı. Mahkeme vesiqalı delillerni baquv vaqtı daa kelmedi ve bu meselege daa soñra qaytmağa imkân olacaq, dep bildirdi. Bundan soñ devlet qabaatlayıcısı qararını ilân etti, imaye ise Mustafa Cemilevniñ fikrini seslendirdi.
Advokat Nikolay Polozovnıñ aytqanına köre, imaye, Qırım vaqtınca işğal etilgen topraq ve anda Ukraina vatandaşlarınıñ taqip etilüvi qanunsız ola, dep bildire. Qayd etilgenine köre, Cemilev qabaatı olaraq aydınlatılğan 2014 senesi mayıs 3 vaqiaları olıp keçken yerde Rusiye devlet sıñırı olğanını qabul etmey.
Mahkeme oturışuvında iyülniñ 30-na qadar qabaatlav şaatlarını davet etmek içün teneffüs ilân etildi. Nikolay Polozovnıñ qayd etkenine köre, Qırımda hırsızlanğan Ervin İbragimov alâ daa bu şaatlar arasında bar.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırımda mayısnıñ 27-nde Rusiye Tahqiqat komiteti qırımtatar halqınıñ lideri Mustafa Cemilevge qarşı «cinaiy dava» tahqiqatını yekünledi.
İyünniñ 8-nde berilgen malümatqa köre, Rusiye Tahqiqat komiteti Cemilevniñ davasını mahkemege berdi. Bundan soñ Cemilevniñ advokatı Nikolay Polozov ne oña, ne de müvekkiline haber etilmedi, dep bildirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
