Qırımda Rusiye kontrolindeki Ermeni Bazar şeer mahkemesi aprelniñ 22-nde saat 13:00-da qırımtatar halqınıñ lideri Mustafa Cemilevniñ ğıyabiy ükmüni çıqaracaq, dep bildire Qırım.Aqiqat mühbiri.
Daa evel berilgen malümatqa köre, Rusiye Federatsiyasınıñ qabaatlavı qırımtatar halqınıñ lideri Mustafa Cemilev içün «Rusiye sıñırını qanunsız keçüv» maddesine istinaden üç yıl yaşav tarzı koloniyada qalmasını talap etti. Aynı vaqıtta Rusiye prokurorları «silâ ve silâ parçalarını qanunsız saqlav» qabaatlavı eskirgeni içün Cemilevni cezasız qaldırmağa rica ete.
Cemilevniñ advokatı Nikolay Polozovnıñ içtimaiy ağlarda bildirgenine köre, aprelniñ 18-nde Ermeni Bazarda «Mustafa Cemilev davasınıñ» mahkeme munaqaşaları başlanmalı. İmayeci 20 aydan berli qadı Venera İsroilova reisliginde mahkeme tahqiqatı devam etti, dep bildirdi. Rusiye akimiyeti Mustafa Cemilevni qabaatlavnıñ üç maddesine köre qabaatlay. Polozov qırımtatar halqınıñ liderine qarşı cinaiy davanı «tamamen sahte» dep adlandıra.
Prezidentniñ Qırım Muhtar Cumhuriyetindeki temsilciligi Mustafa Cemilevge qarşı cinaiy davanı «siyasiy taqip» dep adlandırdı.
Qırımda 2021 senesi martnıñ 5-nde mahkeme oturışuvında Cemilevniñ Qırımğa kiriş yasağınıñ 15 yılğa uzatılğanı belli oldı – 2034 senesi martnıñ 5-ne qadar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
