Ermeni Bazardaki mektepler yarımadanıñ Rusiye akimiyeti şeerdeki ekologik vaziyetten sebep ilân etken «tatilden» soñ işke başladı. Bunı şeer memuriyeniñ yolbaşçısı Vasiliy Telijenko bildirdi, dep haber ete TASS.
«Talebeler bugün saba mektepke ketkenler. Mektepler çalışa, er şey yerinde. Şeerdeki vaziyet turğunlaştı. Bazarertesi künü 1570 bala ve ana-babası ile beraber bala keldi, tünevin (salı künü – QA) daa 1300 insan keldi. Balalar şeerge qayttı», – dep bildirdi o.
Ermeni Bazarda fevqulâde vaziyet rejimi lâğu etildi.
Sentâbrniñ 23-nde içtimaiy ağlarda yerli sakinler fevqulâde vaziyet lâğu etilgen soñ balalar Ermeni Bazarğa qaytqanını yazmağa başladı.
Avgustnıñ 23-den 24-ne keçer gecesi Ermeni Bazarda ne olğanı belli olmağan taşlamalar qayd etildi. Qırım memuriyeti aytqanına köre, zararlı maddeler taşlantılarınıñ sebebi yarımada şimalinde «Qırım titanı» qullanğan ekşilik havzularından çıqqan buvlanuvdan olğan eken. Uzun yıllar devamında istisal taşlantıları aqızılğan havuz sıcaqtan sebep quruğan, dep iddia ete memurlar.
Kyiv, Qırımda himik maddelerniñ taşlatıları Rusiye arbiyleri sebebinden olğanını tüşüne. Talimler vaqtında titan ve soda zavodlarınıñ istisal qalımtıları ile tındırğıçlarğa ateş açılğan eken.
Qırımnıñ rus yolbaşçısı Sergey Aksönovnıñ emri ile mektep çağındaki ve mektep çağına yetmegen balalar Qırım şifahanelerine alıp ketirildi.
Sentâbrniñ 14-nde fevqulâde vaziyet ilân etildi.
«Qırım titanı» zavodı 1971 senesi işke başlap, 2000-inci seneleri Dmitriy Firtaşnıñ Groop DF şirketiniñ kontroline keçti. Müessiseniñ esas işi boya tehnik sanayı, plastmass azırlaması ve diger saalarda qullanılğan maddeniñ işlep çıqarılmasınen bağlıdır.
2014 senesi Rusiye Qırımnı işğal etken soñ Dmitriy Firtaş zavodnı idare etüv strukturasını deñiştirdi. Oktâbr ayında Groop DF «Qırım titanını» Rusiyeniñ «Titanovıye investitsii» müessisesine berdi. 2015 senesi «Qırım titanı» «Ukrainian chemical products» adını aldı.
