Cumaaqşamı künü, iyülniñ 9-nda, işğal etilgen Qırımnıñ Rusiye kontrolindeki Ermeni Bazar şeer mahkemesinde qırımtatar halqınıñ milliy lideri, Ukraina Yuqarı Radasınıñ halq deputatı Mustafa Cemilevge qarşı davanıñ ilk diñlevleri olacaq.
«İnterfaks» bildirgenine köre, mahkeme oturışuvı «qaidelerge köre qapalı olacaqtır».
«Cemilevniñ davası» boyunca ilk mahkeme diñlevleri iyünniñ 25-nde olacaq eji, amma resmiy sebeplerden oturışuv iyülniñ 9-na avuştırıldı.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırımda mayısnıñ 27-nde Rusiye Tahqiqat komiteti qırımtatar halqınıñ lideri Mustafa Cemilevge qarşı «cinaiy dava» tahqiqatını yekünledi.
İyünniñ 8-nde berilgen malümatqa köre, Rusiye Tahqiqat komiteti Cemilevniñ davasını mahkemege berdi. Bundan soñ Cemilevniñ advokatı Nikolay Polozov ne oña, ne de müvekkiline haber etilmedi, dep bildirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
