Martnıñ 4-nde, Rusiye nezaretinde olğan Ermeni Bazar şeer mahkemesinde qırımtatar halqı milily lideri Mustafa Cemilevniñ davası boyunca nevbetteki oturış vaqtında dava materialları baqılğan. Bunı Qırım.Aqiqat mühbiri haber ete.
Onıñ malümatına köre, mahkeme Mustafa Cemilevniñ oğlu Hayserniñ davası çerçivesinde keçirilgen evini baqıp çıquv protokolını tetqiq etmege qarar alğan. Advokat Nikolay Polozov isbatlar qabul etilmez, dep tanımağa muracaat etken, çünki olar Cemilevniñ davasına ait degil, amma mahkeme muracaatnı red etken.
Bundan ğayrı mahkemede Mustafa Cemilevniñ oğlunıñ davası boyunca şaat olaraq bergen şaatlığı ilân etilgen. Buñ köre, karabin ve arbiy yedekler 1996 senesi qanuniy olaraq satın alınğan. Teşkerici organlar bu predmetlerniñ saqlap tutuv şaraitini sıq-sıq teşkerip, iç bir bozuv qayd etmegen ediler.
Bu yerde mahkeme oturşnı toqtattı ve teneffüs ilân etti. Nevbetteki mahkeme oturışı martnıñ 5-nde saba saat 9:30 olacaq.
Qırımdaki Rusiye Tahqiqat komitetiniñ idaresi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Advokat Nikolay Polozovnıñ aytqanına köre, Cemilevge qarşı oğlu Hayserniñ Ukraina davası qullanıla.
Mustafa Cemilev, işğal etilgen Qırımda oña qarşı açılğan cinaiy davalarda «Rusiye tarafınıñ qabaatlavları saçma olğanını» Avropa insan aqları mahkemesinde isbatlamağa niyetlene, dep bildirdi.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
