Rusiye kontrolindeki Ermeni Bazar şeer mahkemesi noyabrniñ 13-nde ğıyabiy şekilde mahküm etilgen qırımtatarlarnıñ milliy lideri Mustafa Cemilevniñ davası boyunca oturışuvında şaat Ervin İbragimovnı zorlap ketirmege qarar aldı. Mahkeme Cemilevniñ oğlu Hayserni de diñlemege istey. Bu aqta Qırım.Aqiqat mühbiri bildire.
Cemilevniñ advokatı Nikolay Polozovnıñ malümatına köre, bir şaat sorğuğa çekilgen soñ ve diger şaatlar kelmegeni içün mahkeme oturışuvnı başqa künge qaldırmağa qarar aldı. Kelmegen şaatlarnıñ sorğularını ise videokonferentsiya bağı rejiminde temin etmege talap etti.
«Mahkeme, şaat Ervin İbragimovnı mahkeme oturışuvında iştirak etmesi içün zorlap ketirmege qarar aldı. Bundan ğayrı, mahkeme diger şaatlarnı sorğuğa çeküv tertibini belgiledi. Hususan, Hayser Cemilevni. Oña eki kere haber etilgenine ve imaye tarafı Rusiye Ceza-protsessual kodeksiniñ 453-ünci maddesine köre devletlerara muracaat yollamağa teklif etkenine baqmadan, mahkeme tek haber etmege qarar berdi», – dep qoştı advokat.
Bundan ğayrı, mahkemede qabaatlav şaatı Artem Latışev – 2014 senesi Ermeni Bazar yaqınlarında Rusiye keçiş noqtasında hızmet etken arbiy – sorğuğa çekildi.
Advokatnıñ aytqanına köre, şaat, memuriy sıñırda bulunğan Mustafa Cemilev «kontrol keçiş noqtasından çıqmağa, Ermeni Bazar tarafına keçmege tırışmadı, tek kontrol keçiş noqtasında ketip, insanlarnen laf etti», dep bildirdi.
O, sıñır qayda olğanını da añlatıp olamadı.
«Şaat, devlet sıñırı qayda olğanını bilmey, dep kösterdi. Bunı olarğa añlatmadılar, er angi insan devlet sıñırınıñ qayda olğanını añlaması içün bir işaret olğanını da aytıp olamadı. Şaat, o vaqıt kontrol keçiş noqtasınıñ yaqınlarında belli sıñır işaretleri bar edimi-yoqmı sualine cevap berip olamadı. İşaretlerniñ olması devlet sıñırınıñ talabı ola», – dep añlattı Polozov.
Onıñ malümatına köre, nevbetteki oturışuv dekabrniñ 3-ü ve 4-üne planlaştırıla.
Bir kün evelsi de Ermeni Bazar mahkemesinde şaatlar sorğuğa çekildi.
Qırımdaki Rusiye Tahqiqat komitetiniñ idaresi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Advokat Nikolay Polozovnıñ aytqanına köre, Cemilevge qarşı oğlu Hayserniñ Ukraina davası qullanıla.
Mustafa Cemilev, işğal etilgen Qırımda oña qarşı açılğan cinaiy davalarda «Rusiye tarafınıñ qabaatlavları saçma olğanını» Avropa insan aqları mahkemesinde isbatlamağa niyetlene, dep bildirdi.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
