Rusiye kontrolindeki Ermeni Bazar şeer mahkemesi fevralniñ 12-nde Qırımda ğıyabiy şekilde mahkeme etilgen qırımtatar halqınıñ milliy lideri Mustafa Cemilevge qarşı dava boyunca yazma qabaatlav delillerini tedqiq etmege devam etti.
Mahkeme oturışuvında qadı Venera İsroilova Cemilevniñ advokatı Nikolay Polozovnıñ dava malümatlarından 2013 senesi Mustafa Cemilevniñ oğlu Hayser Cemilevniñ davası boyunca keçirilgen ekspertizanı çıqarmaq muracaatını red etti, dep bildire Qırım.Aqiqat mühbiri.
«Oturışuvda mahkeme tap 2013 senesi bam-başqa cinaiy dava – Ukraina Ceza kodeksi çerçivesinde Hayser Cemilevge qarşı keçirilgen ve davamıznen alâqası olmağan mahkeme-tibbiy ekspertniñ hulâsasını seslendirdi. İmaye bu delilni qabul etilmez tanıp, dava malümatlarından çıqmarğa rica etti, çünki bu ekspertiza delil ve qanunğa zıt bir ekspertiza olaraq kösterilemez. Amma qabaatlav qararında bu ekspertişça delil olaraq kösterile. Bam-başqa cinaiy davanıñ malümatı, vesiqalarnı, tahqiqatçı qararını ve cinaiy davamızğa nasıl keçkenlerini körmedik», – dep izaatladı Polozov.
Onıñ aytqanına köre, mahkeme bu muracaatnı baqıp, taqdirlemege razı olmadı, çünki «mahkeme davanıñ bütün malümatlarını tedqiq etmedi». O, mahkemede qabaatlav tarafınıñ daa bir sıra vesiqası seslendirildi, dep bildirdi. Polozovnıñ fikirince, olarnıñ baqılğan dava ile iç alâqası yoq.
Mustafa Cemilevniñ davası boyunca nevbetteki oturışuv Qırımda mart ayında olacaq.
Qırımdaki Rusiye Tahqiqat komitetiniñ idaresi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Advokat Nikolay Polozovnıñ aytqanına köre, Cemilevge qarşı oğlu Hayserniñ Ukraina davası qullanıla.
Mustafa Cemilev, işğal etilgen Qırımda oña qarşı açılğan cinaiy davalarda «Rusiye tarafınıñ qabaatlavları saçma olğanını» Avropa insan aqları mahkemesinde isbatlamağa niyetlene, dep bildirdi.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
