Rusiye kontrolindeki Ermeni Bazar şeer mahkemesi Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davasında teneffüs ilân etti. Teneffüs şaat Ervin İbragimov kelmegeni içün dekabrniñ 4-ne qadar ilân etildi, dep bildire Qırım.Aqiqat mühbiri.
Soñki oturışuvda qadı Venera İsroilova «Ervin İbragimovnı zorlap ketirmege» qarar berdi.
«Bugün mahkemege Bağçasaray mahkeme vekilleri federal hızmetinden haber keldi, olar onıñ (Ervin İbragimovnıñ – QA) evine bardı, amma babası Ervin 2016 senesi yol patrul hızmeti hadimleri urbasında insanlar tarafından hırsızlanğanını bildirdi, dep haber ete. Şunıñ içün mahkemege bildirme yapıldı. Men mahkemeden Ervin İbragimovnıñ hırsızlanmasınen bağlı davanı baqqan tahqiqat organına muracaat etmesini rica ettim, bu dava ne alda olğanını bilmek kerekmiz», – dedi Mustafa Cemilevniñ advokatı Nikolay Polozov.
Onıñ aytqanına köre, eki diger şaat da videokonferentsiya bağı vastasınen sorğuğa çekilmedi.
«Bir şaat Zabaykalye ülkesinde askerlikte buluna, mahkeme saat farqını esaplamadı, şunıñ içün diger şaatlar da sorğuğa çekilmedi, Ermeni Bazar şeer mahkemesinde olacaq sorğu vaqtında Zabaykalye mahkemesi endi çalışmay. Diger şaat Omarova çalışa ve arasız hızmet olğanı içün eñ yaqın vaqıtta mahkeme oturışuvına qoşulıp olamay, dep bildirdi», – dep qoştı advokat.
Onıñ qayd etkenine köre, devlet qabaatlayıcısı delillerni berüv tertibini deñiştirmeyip, qabaatlav tarafınıñ şaatları sorğusında israr etken soñ, mahkeme oturışuvnı dekabrniñ 4-ne qaldırmağa qarar alındı.
Rusiye kontrolindeki Ermeni Bazar şeer mahkemesi noyabrniñ 13-nde ğıyabiy şekilde mahküm etilgen qırımtatarlarnıñ milliy lideri Mustafa Cemilevniñ davası boyunca oturışuvında şaat Ervin İbragimovnı zorlap ketirmege qarar alğan edi. Mahkeme Cemilevniñ oğlu Hayserni de diñlemege istey.
Qırımdaki Rusiye Tahqiqat komitetiniñ idaresi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Advokat Nikolay Polozovnıñ aytqanına köre, Cemilevge qarşı oğlu Hayserniñ Ukraina davası qullanıla.
Mustafa Cemilev, işğal etilgen Qırımda oña qarşı açılğan cinaiy davalarda «Rusiye tarafınıñ qabaatlavları saçma olğanını» Avropa insan aqları mahkemesinde isbatlamağa niyetlene, dep bildirdi.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
