Link açıqlığı

Saatnıñ esas haberi

Ermeni Bazar: «Cemilevniñ davası» boyunca mahkemede qabaatlav tarafınıñ şaatını sorğuğa çektiler


Mustafa Cemilev, 2014 mayısı
Mustafa Cemilev, 2014 mayısı

Rusiye kontrolindeki Ermeni Bazar şeer mahkemesinde iyülniñ 30-nda Qırımda ğıyabiy şekilde mahküm etilgen qırımtatarlarnıñ Milliy lideri Mustafa Cemilevniñ cinaiy davası boyunca ekinci mahkeme oturışuvı yekünlendi. Qırım.Aqiqat mühbiri bildirgenine köre, oturışuvda qabaatlav tarafınıñ şaatı Muzafar Fukala sorğuğa çekildi.

Oturışuv açıq oldı. Şaat, 2014 senesi mayısta olğan adise-vaqialar vaqtında, yarımada Rusiye tarafından endi işğal etilgende, «Ermeni Bazardan soñraki devlet avtoinspektsiyasınıñ noqtasında avtomatlı kamuflâj ve balaklavalı insanlar tura edi. O yerde bronetransportör da yolnı qapatqan edi. Bu insanlar avağa ateş açtı. Silâlı insanlar bir şey talap etmedi. Cemilev ise yarıp keçmege tırışmağan edi».

Sorğuğa çekilgen şaat «kimse Cemilevge kirişi yasaqlanğanını ya da bir de bir areket yasağı aqqında haber etmege tırışmadı», em de «bu yerde Rusiye devlet sıñırı keçkenini köstergen işaretler olmağanını» ayttı.

Bu dava boyunca Ermeni Bazardaki mahkemeniñ nevbetteki oturışuvı sentâbrniñ 10-nda olmalı.

Bugün daa bir mahkeme Aqmescitte olacaq, Rusiye kontrolindeki Qırım Yuqarı mahkemesi Mustafa Cemilev tutulğanda 2 ayğa apiske aluv qararına qarşı berilgen istinaf şikâyetini baqmalı.

Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.

Qırım ve Aqyardaki Rusiye Tahqiqat komiteti mayısnıñ 27-nde bu davanıñ tahqiqatını bitirdi.

Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.

Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.

Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.

Mustafa Cemilev 1991 senesi Qırımğa qaytıp oldı.

III-IX çağırılış Ukraina Yuqarı Radasınıñ halq deputatı ola.

Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.

2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.

XS
SM
MD
LG