ABD, Ankarağa qarşı Rusiyeden S-400 zenit-raketa komplekslerini satın alğanı ve Şimaliy Suriyede arbiy tedbirler keçirgeni içün sanktsiyalar kirsetse, Türkiye prezidenti Recep Tayyip Erdoğan, Türkiyedeki «İncirlik» Amerika ava bazası qapatıla bile, dep ayttı.
Dekabrniñ 15-nde Erdoğan A Haber telekanalına intervyü berip, Avropa raketağa qarşı mudafaa sistemaları olğan «Kürecik» bazası da qapatıla bile, dedi. Türkiye prezidentiniñ aytqanına köre, böyle qarar Türkiye akimiyeti tarafından «kerek olsa» alına bile, dep haber ete Azatlıq Radiosı.
Türkiyege qarşı sanktsiyalar yaqın künlerde Kongress tarafından tasdıqlanacaq ABD arbiy bücetiniñ leyhasında bar. Olar Rusiyege qarşı kirsetilgen sanktsiyalarnen bağlı.
Türkiyege qarşı daa sert sanktsiyalar keçken afta ABD Senatınıñ halqara komitetinde tasdıqlanğan edi. Bundan ğayrı, Senat Osmanlı devletinde ermeni genotsidiniñ tanılmasına dair qararğa ilk sefer qoltuttı.
Erdoğan, ne ABD, ne de Rusiye Türkiyede terrorist sayılğan silâlı kürt taqımlarınıñ Suriyeniñ şimaliy rayonlarını terk etmesine irişip olamadı, dep bildirdi. Onıñ aytqanına köre, Türkiye terrorizm ile küreşmek içün «bayağı qararlı». Erdoğan, Türkiye Suriye Şimaliyende arbiy tedbirlerni kene başlatacaqmı aytmadı.
Bu tedbirler NATOda bir çoq munaqaşanıñ sebebi oldı, Frenkistan prezidenti Emmanuel Macron alyanstaki vaziyetni «miy ölüminen» qıyasladı.
«İncirlik» bazasında esasen ABD Arbiy ava quvetleriniñ yardım uçaqları buluna. Baza Yaqın Şarqta Amerika taqımınıñ teminatında müim rol oynay.
