Türkiye prezidenti Recep Tayip Erdoğan Ukraina ve Rusiye devlet başları Volodımır Zelenskıy ve Vladimir Putin ile telefonnen laf etti ve ekisini de Türkiyede bir körüşüv keçirmege davet etti. Bunı yanvarnıñ 19-nda Türkiye prezidentiniñ spikeri İbragim Kalin bildirdi.
Onıñ malümatına köre, Erdoğan "yaqın aftalarda" Ukrainanı ziyaret etecek ola.
Erdoğannıñ temsilcisi bildirdi ki, Türkiye "aqibetleri büyük ve qaytarılmaz olacaq er angi arbiy areketelrden qaçmaq içün" Rusiye ve Ukraina arasında kerginlikniñ azlaştırılmasında rol oynamağa azır.
"Türkiye er angi rol içün açıq qala... Rusiye ve Ukraina arasında kerginlikniñ azlaştırılması içün... Ve biz bunı Rusiye ve Ukrainağa dost memleket ve NATO ittifaqdaşı kibi yapamız", - dedi Kalin.
Ukraina ve Rusiye tarafı Türkiye prezidentiniñ teklifini şimdilik daa tefsir etmediler.
Keçenlerde, Türkiye Cumhuriyetiniñ prezidenti Recep Tayyip Erdoğan «Putin ile yapqan er körüşüvde» «Türkiyeniñ Qırımnıñ işğaline qarşı olğanını» ayta, dep bildirdi. Bu aqta Türkiye lideri Arnavutlıq ziyareti vaqtında jurnalistlerge ayttı, dep bildire «Anadolu» haber agentligi.
2021 senesi Birleşken Milletlerde Türkiye prezidenti memleketiniñ Qırım ilhaqını tanımağanını tekrarladı. Kreml, Erdoğannıñ Qırım lafları onıñ Rusiye ziyaretine tesir etmeycek, dep bildirgen edi.
Erdoğan, Türkiye «Rusiye ve Ukraina munasebetleriniñ kerginleşüvini toqtatmaq içün issesini qoşmağa azır», dep bildirgen edi.
2021 senesi noyabrniñ 26-nda Ukraina prezidenti Volodımır Zelenskıy Kyiv Türkiye prezidenti Recep Tayyip Erdoğan vastasınen Vladimir Putinge Ukraina azat etilüvini beklegen ukrainalı siyasiy mabüslerniñ cedvelini berdi, dep bildirdi. Kreml Zelenskıynıñ aytqanlarını tefsir etmedi.
