Link açıqlığı

Saatnıñ esas haberi

Erdoğan, Türkiyeniñ Qırım işğalini tanımama qararını tasdıqladı – KHV


Recep Erdoğan
Recep Erdoğan

Aprelniñ 10-nda İstanbulda Türkiye prezidenti Recep Tayip Erdoğan Ukraina devlet başı Volodımır Zelenskıy ile aytışmalarda Türkiyeniñ Qırım işğalini tanımama qararını tasdıqladı. Bunı Türkiye devlet başı TRT telekanalı yayınlanğan matbuat köferentsiyası vaqtında bildirdi, dep haber ete TASS.

«Biz Ukrainanıñ topraq bütünligi ve suverenitetine qoltutamız. Qırım işğalini tanımama qarırımıznı tasdıqladıq. Halqara toplulıqnı Qırım mevzusı etrafında birleştirmek maqsadınen Ukrainanıñ «Qırım platforması» teşebbüsini desteklegenimizni bildirgen edik. Bu teşebbüs Ukraina ve Qırımnıñ halqalarına, şu cümleden qırımtatarlar da, müsbet neticeler berecegine ümüt etemiz», – TASS Erdoğannıñ aytqanlarından alıntı ketire.

Bundan ğayrı, onıñ qayd etkenine köre, Ukraina ve Türkiye strategik işbirlikni devam etmege añlaşqanlar.

«2+2 formatında yañı mesleatlarnı başladıq, böylece memleketlerimiz arasında koordinatsiyanı pekitemiz. Mudafaa saasındaki işbirligimiz diger memleketlerge qarşı yapılğan teşebbüs degil», – dedi Türkiye devlet başı.

Türkiye, Ğarp memleketlerniñ Moskvağa qarşı qoyğan sanktsiyalarğa qoşulmasa da, Ukrainanı Rusiye tecavuzını qarşı turmasında destekley. Türkiye Ukrainanıñ onıñ halqara seviyede tanılğan sıñırlarında suvereniteti ve topraq bütünligine qoltuta.

Qırımnıñ Rusiye tarafından işğal etilüvi

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG