Olarnıñ aytqanlarına köre, Erdoğannıñ teklifinde Ukrayina NATOğa kirmek meselesiniñ muzakere etilüvini eñ az 10 yılğa keçiktirmek bar.
Erdoğan Donbasta askeriysizleştirilgen alannı yapmağa ve «qoşma kefalet olaraq» anda halqara askerlerni yerleştirmege teklif ete. Bundan ğayrı, Türkiye prezidenti NATOda iştirak etmemege razı olğanı içün Ukrayinağa arbiy mahsulatlarnı tazminat olaraq bermege teklif ete.
Bloomberg ile subetleşken Türkiye memurları Ukrayinağa böyle teklifni qabul etmek qıyın olacağını ayttı, amma, olarnıñ fikrince, bu eñ kerçekçi yanaşuvdır. Agentlik yaza ki, Türkiye memurları «işğal etilgen topraqlarnıñ uzun müddetli taqdiri aqqında muzakerelerni bir çetke qoyıp, stabil ateşkesni temin etmege isteyler».
Erdoğan Ukrayina prezidenti Volodımır Zelenskıynı İstanbuldaki muzakerelerde iştirak etmege inandıra bilecegine ümüt ete, çünki, agentlikniñ menbaları aytqanına köre, Türkiye lideri «cenk toqtatılmasa, yaqın aylarda Ukrayina daa çoq toprağını coya bilecegine dair istihbarat malümatını aldı».
«Büyük yigirmi» sammiti noyabrniñ 18-19-nda Rio-de-Janeyroda keçirilecek. Rusiye ve Türkiye bu gruppağa kire, amma Ukrayina bu gruppağa kirmey. Rusiye prezidenti Vladimir Putin evelden oña qarşı halqara apiske aluv qararı olğanı sebebinden forumnıñ işini «bozmamaq» içün sammitke barmaycağını aytqan edi.
Soñki vaqıtları Ukrayinanıñ ittifaqdaşları zıddiyet taraflarını muzakerege başlamağa iqna etmek içün ıntıluvlarını arttırdı. Noyabrniñ 15-nde Almaniya kantsleri Olaf Şolts Vladimir Putinnen eki yıl içinde birinci kere telefon subetini keçirdi. Frenkistan prezidenti Emmanuel Makron Putinnen laqırdı etmek imkânını red etmedi, tek «kontekst» kelişsin dedi. Makron Putin «barışıq istemey» ve bu aqta muzakere etmege azır degil, dep tüşüne.
Ukrayina prezidenti Volodımır Zelenskıy noyabrniñ 16-nda bergen intervyüsında Ukrayina akimiyeti cenkniñ 2025 senesi diplomatik yolnen bitmesini temin etmek içün «er şeyni yapmaq kerek» olğanını ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
