Türkiye prezidenti Recep Tayyip Erdoğan, Türkiyeniñ Qırımnıñ işğaline ve Rusiyeniñ Ukrainanıñ topraq bütünligine zarar ketirgen diger adımlarına munasebetiniñ deñiştirilmesi aqqında "laf ola bilmez" dedi. Bunı o Türkiye KHV ayttı, dep haber ete "Anadolu".
"Ümüt etem ki, Rusiye Ukrainağa qarşı silâ qullanmaz. Çünki böyle bir adım ne Rusiye, ne de bizim bölgemiz içün ratsional adım olmaz. Bunı añlap ve mesüliyetli bir regional memleket olaraq, kerginlikniñ silâlı çatışmağa çevirilmesine yol bermemek içün kerekli çareler körmege azır olğanımıznı bildiremiz", - dedi o.
Erdoğan Rusiye prezidenti Vladimir Putinni onıñle eki taraflı körüşüv keçirmek içün Türkiyege davet etti. Türkiye prezidenti Putinden bu davetke şimdilik cevap daa almağan.
Bundan ğayrı, Erdoğan eki memleket arasındaki añlaşamamazlıqnı tınç yolnen çezmek içün Ankaranıñ Rusiye ve Ukraina devlet başları arasında körüşüv keçirmege azır olğanını bir daa bildirdi.
Daa evel, Türkiye Cumhuriyetiniñ prezidenti Recep Tayyip Erdoğan «Putin ile yapqan er körüşüvde» «Türkiyeniñ Qırımnıñ işğaline qarşı olğanını» ayta, dep bildirdi. Bu aqta Türkiye lideri Arnavutlıq ziyareti vaqtında jurnalistlerge ayttı, dep bildire «Anadolu» haber agentligi.
2021 senesi Birleşken Milletlerde Türkiye prezidenti memleketiniñ Qırım ilhaqını tanımağanını tekrarladı. Kreml, Erdoğannıñ Qırım lafları onıñ Rusiye ziyaretine tesir etmeycek, dep bildirgen edi.
Erdoğan, Türkiye «Rusiye ve Ukraina munasebetleriniñ kerginleşüvini toqtatmaq içün issesini qoşmağa azır», dep bildirgen edi.
2021 senesi noyabrniñ 26-nda Ukraina prezidenti Volodımır Zelenskıy Kyiv Türkiye prezidenti Recep Tayyip Erdoğan vastasınen Vladimir Putinge Ukraina azat etilüvini beklegen ukrainalı siyasiy mabüslerniñ cedvelini berdi, dep bildirdi. Kreml Zelenskıynıñ aytqanlarını tefsir etmedi.
