Türkiye prezidenti Recep Tayyip Erdoğan dekabrniñ 11-nde Rusiye zenaatdaşı Vladimir Putinnen telefonda laf etti, dep haber ete TRT Haber kanalı.
«Regional meseleler, hususan energetika, Türkiye-Rusiye munasebetleri, zahire ayatı ve terror ile küreş muzakere etildi», – dep aytıla haberde.
Türkiye kütleviy haber vastalarınıñ malümatına köre, taraflar sayesinde Rusiyeden blok etilgen Ukrayına aşayt mallarınıñ ihracatı yapılğan zahire añlaşmasınıñ yerine ketirilüvini muzakere etti.
Türkiye prezidenti bir teşebbüsni teklif etti, «zahire ayatı» çerçivesinde çeşit aşayt malları, ileride ise diger mallarnıñ ihrac etilüvi kerçekleştirile bilecek eken.
Bundan ğayrı, Putinnen laf etken Erdoğan «Rusiye ve Ukrayına arasında tez vaqıtta cenk bitmesini istey», dep ayttı.
Ukrayına agrar mallarınıñ deñizden taşımasınen bağlı «zahire teşebbüsi» daa 120 künge uzatıldı, dep bildirdi Ukrayına infrastruktura nazirligiiñ matbuat hızmeti noyabrniñ 17-nde.
Noyabrniñ 2-nde Rusiye Mudafaa nazirligi Moskva Qara deñiz koridorından zahire ihracatı añlaşmasında kene iştirak ete, dep bildirdi. Bundan bir qaç kün evelsi ise Rusiye añlaşmada iştirak etmekten vazgeçti, dep aytqan edi.
Ukrayına Tış işler nazirligi zahire añlaşmasında olğan şartlardan ğayrı yañı bir vazife almadı, dep qayd etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
