Türkiye akimiyeti Ukrayina ve Rusiye liderlerini qabul etmege azır, dep bildirdi memleketniñ prezidenti Recep Tayyip Erdoğan iyulniñ 25-nde.
O, jurnalistlernen laf etip, eki memleket eyyetleriniñ İstanbuldaki soñki körüşüvini hatırlap, Ukrayina eyyetini qabul etti ve Vladimir Putinnen muzakereler keçirdi, dep qayd etti. Onıñ aytqanlarını Türkiye prezidentiniñ bağ idaresi bildire.
«Kelecekte bu liderlerni (Putin ve Zelenskıynı – Erdoğannıñ matbuat hızmeti qayd ete) İstanbulda körüştirmege tırışacaqmız», – dedi Erdoğan.
O, Putinen tekrar körüşecek ve ABD prezidenti Donald Trumpnen körüşecek, dep tahmin etti. Erdoğan böyle körüşüvler bir afta içinde ola bile, dep tahmin etti.
Bu yaz soñuna qadar Zelenskıy ve Putinniñ şahsiy körüşüvini keçirmek teklifini Ukrayina tarafı İstanbulda keçirilgen Ukrayina-Rusiye muzakerelerinde seslendirdi. Bu teklifke köre, körüşüv ABD ve Türkiye prezidentleri Donald Trump ve Recep Tayyip Erdoğannıñ iştirakinen keçirilmeli.
Ukrayina ve Rusiye iyulniñ 23-nde İstanbulda muzakerelerniñ üçünci raundını keçirdi. Cenk esirlerini deñişmege añlaşıp, tutulğan vatandaşlarnıñ qaytmasını muzakere ettiler.
İstanbuldaki muzakereler ögüne Ukrayina milliy telükesizlik ve mudafaa şurasınıñ yolbaşçısı Rustem Umerov ve Ukrayina prezidentiniñ ofis yolbaşçısı Andriy Yermak Ankaranı ziyaret etip, Türkiye prezidenti Recep Tayyip Erdoğannen subetleştiler.
