Beyanatta Ankara Kyiv ve Moskva arasında barışıq teşebbüslerini diqqatnen taqip ete, hususan Türkiyede muzakere teşkil etmek vastasınen bu esnaslarda yardım etmege azır, dep aytıla.
Bundan ğayrı, Erdoğan Suriyede Türkiye ve Rusiye işbirligi olmalı dep, dinlerara duşmanlıqqa yol açqan areketlerni toqtatmaq içün beraber çalışmağa çağırdı.
Rusiye tarafı liderlerniñ subeti aqqında daa bildirmedi.
Martnıñ 23-25-nde Er-Riyadda ABD vekilleri tehnik seviyede Ukrayina eyyetinen eki taraflama muzakereler keçirdik.
Martnıñ 24-nde Er-Riyadda ABD eyyeti Rusiye vekillerinen 12 saat devam etken muzakere keçirdi.
Martnıñ 25-nde Beyaz saray Saudiy Arabistanda Ukrayinanen Qara deñizde telükesiz gemi areketi aqqında ve energetika obyektlerine qarşı darbe yasağınıñ «mehanizmini azırlamağa» añlaşıldı, dep bildirdi.
ABD prezidenti Donald Trump Saudiy Arabistandaki muzakerelerni izaatlap, «büyük ilerilev» aqqında ayttı.
Kreml muzakere neticelerinen bağlı beyanatını derc etip, Rusiye ve ABD 2025 senesi martnıñ 18-nden başlap 30 künge Rusiye ve Ukrayina energetika obyektlerine qarşı darbe yasağı tedbirlerini azırlamağa razı olğanlar. Washingtonnıñ beyanatında tam künler aytılmadı.
Bundan ğayrı, Moskva Qara deñizde telükesiz gemi areketini teminlev añlaşması Rusiyege qarşı bir sıra sanktsiya lâğu etilgen soñ işke tüşürile, dep bildirdi. Washington yapqan beyanatında böyle bir şart aqqında aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
